14 tylli ki kam thymmai, na bynta ka Child Helpline Service

Shillong:U myntri ka tnad Social Welfare ka jylla u bah Paul Lyngdoh, u la pyntip ba la mang ban thung kam sa 14 tylli ha ka tnad na bynta ka Child Help line Service, khnang ban pynkhlain ia ka jingai shakri sha ki jingdonkam jong ki khynnah ba iakynduh jingeh ha ka jylla.

U number jong kane ka Child Helpline Number u dei 1098 ha kaba ki briew ki lah ban phun haba ki iakynduh ia kano kano ka jingeh ba iadei bad ki khynnah.
Haba kren mynhynnin ka sngi, u bah Paul u la ong ba katkum ka Juvenile Justice Care and Protection of Children Act 2015, ka tnad ka la donkam ban pynkhlain ia ka jingtreikam ka Child Helpline Service namar ba ka dang don tang uwei u nongtrei baroh shi katta.

Kine ki kam kiba thaw thymmai ki long IT Supervisor, Toll operator, multipurpose, security guard bad kane ka dei ka jingjop iaka tnad lyngba ka jinglah ban thaw ia kine ki kam.
U don ruh u number ia ki longkmie 181 ha kaba ki lah ban phun haba ki iakynduh ia kano kano ka jingeh. U la iathuh ka don ka mashin ha ka ophis ka Directorate ka Social Welfare ban buddien haba ioh ia ka jingpyntip da ka phun, nalor ka website.

“Dang shen, kane ka Helpline ka la treikam hapoh ka jingpeit jong u Child Helpline Administrator marwei, hynrei mynta la lah ban pynkhlain ia kane ka Helpline Service da kaba mang 14 tylli ki kam ba thymmai bad kine ki kam kan iarap ia ki jingeh ki khynnah”, la ong u bah Paul.

“Nga sngew kmen ba ngi lah ban mang ia ki kam thymmai 14 tylli ban ai ka jingshakri kaba kham bha”, la ong u bah Paul.