14 tarik ka jingialang VAB ki Rangbah Shnong

Shillong, 11 Nohprah:
Ka Synjuk ki Nong synshar Shnong ka Bri u Hynniewtrep (SNSBH) kan shong jingialang ha ka 14 tarik ka sngi Nyngkong ban iakren bad shim ia ka rai halor ka Village Administration Bill (VAB) jong ka KHADC bad ka JHADC.
Ha kane ka taiew ba la dep, ka SNSBH ka la iakynduh ruh ia u myntri kam pohiing ka ri u Rajnat Singh, ia u secretary ka tnad kam pohiing ba peit ia ka thain mihngi ka India ban kyntu ia ki ban pynsted ban ai noh ia ka jingmynjur ia ka VAB kaba la donkam kyrkieh ban pynkup bor ia ki rangbah shnong ka ri Khasi bad Jaintia.Haba iakren mynta ka sngi, u secretary ka SNSBH u Bah Rapiong L Blah u la ong ba ka Synjuk kan shong jingialang ha ka 14 tarik ban iapyrkhat ia kane ka kam. “ngin sa shong jingialang ha ka 14 tarik Nohprah ban iapyrkhat ia kane ka kam”, la ong u bah Blah bad bynrap, ba ia mynta ym pat lah ban kren eiei hynrei kan shong ha katei ka jingialang ban shim ia ka rai bad ban leh ia kaba donkam.
Ka jingbuh por jong ka SNSBH shi bnai ia ka sorkar ba kan pynurlong noh ia ka VAB ka la kut ha ka 5 tarik Nohprah hadien ba ka la dep ban pynlong ia ka jingiaid paidbah bad ka jingiakynduh bad ka sorkar ha ka 5 tarik Naiwieng.