13tarik pakhang ophis & 15tarik shah thngan U CEM rLada ym trei kam ka ain Rangbah Shnong

Shillong, 10 Jymmang:
Ka 48 kynta jong ka KSU bad ki Sengbhalang, ka la kut noh bad lashai ka sngi, kan lah ban pyn bna ia ki prokram jingia khih jongka.
Ka HSPDP ka la ai por ia ka sorkar shi taiew kata naduh ka 5 tarik u jymmang ba ka sorkar kan jubab bad pyntreikam ia ki jingdawa jong ka, kata ban sangeh shuwa ia ki jingpynmih sertiphiket da kiwei pat ki bor lait noh na ki Rangbah shnong, ka la ai por ruh shi taiew ia ka sorkar ba kan thaw ia ka ain ka ban pynkup bor biang ia ki Rangbah shnong, ha kaba la pyn bna da u bah Ardent M Basaiawmoit ha ka jing ialang bah ba la lamkhmat da katei ka seng kaba la long ha Madan Student.
Ha katei ka jingia lang u bah Ardent u la ong ba lada ka sorkar kam sngap yn pynlong da ki jingiakhih ka yn sdang shuwa da ka pakhang ophis kaba shi taiew lynter, katei ka por ba ka seng HSPDP ka la buh kan kut noh ha ka 12 tarik mynta u bnai bad lada jia ba kam pat ioh jubab ka pakhang ophis ha kylleng ka ri Khasi Jaintia kan sdang naduh ka 13 tarik mynta u bnai. Katba ha kawei pat ka liang, u CEM ka KHADC u bah Adelbert Nongrum u la pynbna ba u la ai por 10 sngi ia ka sorkar ba kan sngap ia ka jingdawa jong u kata ban mynjur noh ia ka Vilage Administration Bill, lym kumta un shah thngan ha ban da iap. Ka por ba u bah Adelbert u la ia kynduh sorkar ha ka 5 tarik u jymmang bad ka 10 sngi ba u la buh kan kut noh ha ka 15 tarik u jymmang, bad lada jia ba ka sorkar kam sngap hapoh katei ka por ba la buh u bah Adelbert haba kren ha ka jingialang bah ha Madan Student u la ong ba u la raikut ban shah thngan ha ban da iap.