13tarik, ka jingialang paidbah ban pyrshah lynti rel ha Nongpoh

Nongpoh, 11 Naitung:
Ki lai tylli ki kyn-hun sengbhalang hapoh ka Jylla kiba kynthup ia ka Hynniewtrep National Youth Front (HNYF), Ri Bhoi Youth Federation (RBYF) bad Federation of Khasi Jaintia & Garo People (FKJGP) ki la rai ban pynlong da ka jingialang paidbah ha ka 13 tarik mynta u bnai ha MUDA Complex Nongpoh.
Haba pyntip sha ki nongthohkhubor, u Bah G.H Kharshanlor, President ka HNYF Sengkmie, u la ong ba ka daw kaba la pynlong ia kine ki lai seng ban pynlong syndon da kane ka jingialang paidbah ha Nongpoh, ka dei ruh halor ka nongrim jong ka jingthmu ka sorkar ban wanrah ia ka Lynti rel sha ka Jylla, hynrei khlem da lah pat ban pyntreikam ia ki kyndon ain ki ban tehpyrkhing ia ka jingioh laitlan jong ki mynder ban rung sha ka jylla.
Kumta haba iadei bad katei ka jingialang paidbah, na ka liang u Bah G.H Kharshanlor, u la kyntu ia ki paidbah ha ka Distrik ba kin wan ban iashimbynta khang ba yn ioh ban iathir bha halor kane ka jingthmu ka sorkar ban wanrah Lynti Rel sha ka jylla.