13ngut phet seng ki MLA U Lalu Prasad ha Bihar

Patna, 24 Rymphang:
Ka seng RJD, ba la ialam da U Lalu Prasad, ka mad ia ka jingjia ba sngew sih, haba u shabuk rang bah jong katei ka seng, U Samrat Chaudhury, u kam ba 13ngut na ki 22ngut ki MLA jong katei ka seng, ki la iehnoh ia katei ka seng sain pyrthei bad ba ki la phah ia ka shithi jingiehnoh kam jongki, ha kaba ki la pan ruh ia ka jaka shong ba kyrpang, na ka bynta jongki, ha ka iing dorbar Jylla jong ka Bihar. Hynrei 5ngut na kitei ki MLA, ki la kyntait ia katei ka jingkam jong U Chaudhury.
U Samrat Chaudhury, uba la ia leit lang bad U Nitish Kumar myntri rangbah ka Bihar sha ka Constituency jongu ha Khagaria ha ka Sngi U Blei, u kam ba kitei ki MLA, kiba pyrshah seng, ki la phah ia ki kot ki sla jongki sha u lamphang dorbar Jylla, U Uday Narain Chaudhuiry, ha ka 14tarik Rymphang 2014, ha kaba ki la iathuh ia ka rai jongki, ban mih noh na ka seng RJD.
U Chaudhury, u kynnoh ba U Lalu Prasad, u dei ka daw bah, kaba la pynsniew ia ka jinglong jingman jong ka seng, naba hadien ba ula mih na phatok ha u snem ba ladep, U Laloo, u bunkam tang sha Delhi bad ula klet noh ia ka seng jongu ha Bihar. “U leit ban pyndem ialade ha ka seng Congress, kaba la phah ia u sha phatok”.