130 ton shi sngi, lum jaboh ka Municipal na Shillong

Shillong,
13 Rymphang:
Tang ha ka shi sngi sngi ka jingmih ki jaboh na ki jaka kiba hap hapoh ka Shillong Municipal Board (SMB) ka la long kaba jubor bha ha kane ka Nongbah Shillong.
Katkum ka jingtip ba la iohlum na u ophisar jong ka SMB, la iathuh ba haduh 130 ton ki jaboh la lum man ka sngi bad leit bret sha Marten Mawlai Mawiong.
U la iathuh ba khnang ban wanrah ia ka sor Shillong kaba khuid kaba suba, ka SMB ryngkat ka jingiatreilang bad ka Urban Affairs ka la pyntreikam ia ka skhim Northeast Region Capital cities and Investment Developmental Programme (NERCCIDP) jong ka sorkar pdeng ha kaba ka Nongbah Shillong kadei kawei kaba la shah jied ban ioh bynta ia kane ka skhim.
Na kane ka skhim ka SMB ryngkat bad ka tnad Urban Affairs ka la dep sdang sam ia ki borti niut sha man la kawei kawei ka longing kiba hap hapoh ka jaka jong ka Muncipal.
Ki shnong kiba hap hapoh ka jingpeit jong ka Municipal baroh ki don haduh 30 hajar tylli ki longing bad haduh mynta ka SMB ka la dep sam 29,634 tylli ki borti niut sha 14,817 tylli ki longing ha ki 20 tylli ki shnong bad ka dang sah sa mar shiteng ban pyndep ha u bnai Lber ban wan. Na ka bynta ki dukan pat, une u ophisar ka SMB u la iathuh ba la dep bthah ba kin thied hi ia la kijong ki borti theh niut bad ki dei ban pyndep shwa ban sdang ia ka jinglum niut.
Katkum ka jingiathuh utei u ophisar ka Municipal, la iathuh ba ha man kawei kawei ka longing la sam ar tylli ki borti niut kiba shongdor T.248 kawei ka borti niut. “ka sorkar ka la pynkhreh ban thaw ia ki kyndon ha kaba yn pynshitom ia kito kiba leh jaboh bad yn shain kuna”, u la ong. Kine ki ar tylli ki borti ki long ar jait kawei dei na bynta ban thep ia ki niut ki ba pyut bad kawei kadei na bynta ban thep ia ki nuit ki bym pyut.
Nalor kine ki borti ban sam sha man la ki thliew iing yn don ruh ki borti ban buh ha ki lynti iaid ban bret ia ki niut da ki nongiaid nongieng. Ia mynta ka SMB ka don saw tylli ki kali niut kiba heh bad 12 tylli ki kali rit ki ban iaid sha ki jaka ban leit lum ia ki nuit. Baroh ki kali baroh jong ka Municipal ki don 32 tylli kynthup bad ki kali rim.