“13 tarik ngin pyniathoh shongkurim, 16 tarik ngin kai ïng Kiaw” Congress Sohiong

Shillong, 11 Nohprah:
Ha ka sngi saitjaiñ jong ka taiew ka la don ka Rally paidbah jong ka seng Congress ha Sohiong, ka la dopn ruh ka rally paidbah jong ka seng UDP bad HSPDP ha katei ka konstitwensi.
Haba kren sha ki nongthohkhubor u President ka Sohiong Block Congress Committee u bah Phrang Kharpan u la ong ba ka seng Congress kam don jingartatien eiei shuh ban jop ha kane ka elekshon shiteng samoi ka ban long ha ka 13 tarik mynta u bnai.
“Ngi shu hap beit tang ia ka sngi lano kan poi ka 16 tarik ban ia niew vote noh” ong u bah Phrang. Shuh shuh u la ong “Ka 13 tarik lei ka dei kata ka sngi ba ngin pyniathoh shongkurim ia u kyrtong jong ngi bad ka 16 tarik pat ka dei ka sngi ba ngin leit kai ïng Kiaw noh sha District council”.
Ha ka sngi saitjaiñ ka Sohiong ka la shongshit bha namar ki Rally elekshon jong ki 3 party ha kaba la iohi ba ha surok, la dap da ki kali wah lama bad ki kali tem jingrwai bad la iohi ia ki paidbah ba ki kynhoi kynkiw ha ki bos, ki trok bad ki kali rit kumjuh. Nangta la iohi ba ki bun ki la shad la mastieh ha surok bah ryngkat ki sur jingrwai na kali.