13 hajar tylli, ki la iap ki sniang, na ka khieshoh ha Assam

Haduh mynta, ki la don 13 hajar tylli ki sniang, kiba la iap ha Assam, na ka khieshoh sniang.

U Atul Bora, myntri ka tnat ri jingri, u iathuh ba ki don 13,033 tylli ki sniang kiba la iap ha kine ki khyndiat taiew ba ladep.

Ka Kaziranga National Park, ka la tih ia ka thliew kaba ar kilometre ka jingjrong bad kaba jylliew hynriew phut, na ka bynta ban tep ia kino kino ki sniang khlaw, kiba ioh ia katei ka khieshoh, ong U Bora hynnin ka sngi.

U myntri, ula leit jngoh ia ka Kaziranga National Park bad kiwei ki jaka ba marjan bad ula leit ia ki lad jing pynkhreh ban iada na katei ka jingpang sniang.

Ka sorkar India, ka la ai jingmut ia ka sorkar Assam, ban pyniap lut noh ia ki sniang ha katei ka Jylla, hynrei haduh mynta ka sorkar Assam, kam pat shym la shim satia ia katei ka rai.

Ka jingpang sniang, ka la sdang shwa ha ki hynriew tylli ki District ka Assam bad kitei ki kynthup ia ka Dhemaji, North Lakhimpur, Biswanath, Dibrugarh, Sivasagar bad ka Jorhat, kaba la sdang naduh U Rymphang 2020, hynrei hadien ka la nang pur sha ki lai tylli ki District jong ka Majuli, Golaghat bad ha Kamrup (Metro).