12tarik, ka jingialang ki draibar taksi ka East Khasi hills, ha madan Malki

Shillong:Hadien ba la iehnoh kam ki nong kitkam barim jong ka East Khasi Hills Local Taxi Welfare Association (EKHLTWA) kiba kynthup ia u Bah Wandonbok Jyrwa, u Bah Disparsing Rani lem bad ki dkhot jong ka Executive Committee; na ka liang ka Association tad haduh mynta kam pat shym la jied thymmai satia ia ki nongkitkam hynrei ka la shu thaw da ka Core Committee ba kan peit bad khmih ia ki kam ki kam kiba dei jong ka Association.

Na ka liang katei ka Core Committee jong ka EKHLTWA hapoh ka jingialam jong u Bah E Kharbani u ba dei u Chairman ka la pynbna ba kan sa pynlong da ka jingialang paidbah ha ka 12 tarik u bnai Lber 2022 ka ban long ha Madan Malki ha ka por 11 baje mynstep.

Haba kren sha ki lad pathai khubor, u Chairman jong ka Core Committee, u la iathuh ba ka jingpynlong ia katei ka jingialang ka long ban ia pyrkhat ia kiba bun ki mat kiba kynthup ban jied thymmai ia ki nongkitkam bad ban iathir jingmut lem bad baroh ki dribar taksi kiba kamai ha East Khasi Hills District. Na ka liang katei ka Core Committee ka la kyrpad ia baroh ki nongniah kali kamai bad ki trai kali ba kin poi lem ryntih ha katei ka sngi ba la pynlong ia katei ka jingialang khnang ba ioh iakren ruh ia ki jingeh kiba kum ki nongniah bad ki trai kali ki don bad mad ia ka jingeh na ka liang jong ki bad ban iakren ruh ia ka dor jong ka bai kali lada ka sorkar ka kloi ban pynduna ia ka dor jong ka bai petrol bad ki kot khajna kali.