Shillong:U Conrad K Sangma, myntri rangbah ka Meghalaya, ula ia kynduh myn hynnin ka sngi, ia u myntri rangbah ka Assam, ha ka Meghalaya Secre teriat ha Shillong.
Ha katei ka jing ia kynduh, la iakren halor u pud u sam jong ki ar tylli ki jylla bad ki arliang mamla, ki la mynjur ba ki don 12 tylli ki jaka kiba don jing ia kynad hapdeng ki ar jylla bad kitei ki dei, halor ki jing shisha, kiba la don bad ki dulir kiba rim.
Haba iakren bad ki kotkhubor, U Conrad Sangma bad U Himanta Biswa Sarma, ki iathuh ba halor kitei ki 12 tylli ki jaka, ba don jing ia kajia, ka Meghalaya, ka kam trai, ba dei ban pynphai ia kitei ki jaka, katba ka Assam ruh ka kam trai sha lade ia kitei ki shnong.
Halor katei ka jing ia tan tylli, ki arliang mamla, ki la poi sha ka mat, kaba ki iakren ban ia shim bad ia ai lane kaba ki ong give and take.
La ong da U Himanta “Da kaba ia kam trai baroh arliang, kan nym poi satia, sha ka jing ia beit, hynrei ka donkam ban don ka jing ia sngewthuh jingmut lang” bad ula ong ba ki ar tylli ki sorkar, kin iakren ia kawei pa kawei ka jaka, na ka bynta ban ia beit kawei pa kawei, na kitei ki 12 tylli ki jaka ia kajia.
U Sarma, u ong ba ka jingiakren mynta ka sngi, ka long kaba iaid beit, ha kaba u mynjur ban iaid noh sha palat, na kaba ju long lane kaba ki ju ong status quo. U Sarma, u ong shuh shuh “Nga la khot sngewbha ia U Conrad Sangma, ha ka 6tarik Nailar, ban iakren ia ka bynta kaba ar jong ka jingiakren, halor kane ka mat jong ki 12 tylli ki jaka ba ia kynad”.
U Conrad Sangma, haba shim bynta, ha ka jingiakren, u ong ba kane ka kam pud, ka la neh la slem bah bad ki nongshong khappud, ki la mad ia shibun ki jingeh. U Sangma, ula ong ruh ba ha ka jing ialang, kaba mynta ka sngi, ki la ia kren, ba ki nym ieng shuh halor ka nongrim jong kaba rim lane ka status quo, hynrei ban pynbeit noh ia ka jing ia kam pud mar kylliang.
“Ban shui iai iakren ia ka histori lane ia ki kot ki sla kiba mynshwa, kan nym long ka lynti kaba bha, hynrei dei ban peit ia ka lad kaba ia pdiang lang baroh arliang” ong U Sangma.
U Sangma, u ong shuh shuh ba kane ka jing ia pynbeit pud, ka dei ruh, kaba U Amit Shah myntri korbar ri, ka sorkar India, u ju thrang bad u ju kylla man ka por, halor kane ka mat.
Haba jubab ia ka jingkylli U Himanta, u ong ba na kitei ki 12 tylli ki jaka ba ia knieh pud, kin don ruh, kiba ka sorkar India, kan hap ban don bynta lang, namar ba ia ka kam pynbeit pud, kan dei ka ain jong ka Parliament.
Haba jubab shuh ia ka jing kylli, U Conrad Sangma, ula ong ba ka jingiakren ban poi sha ka jing ia beit ia ka jing ia knieh kam pud, kam dei ruh ban shu klet noh ia ka mat, kaba la don lypa, hynrei ha kajuh ka por, ka dei pat ban wad noh ia ki lad ki lynti ban poi sha ka jing ia pynbeit noh syndon.
Phi don ban ong eiei?