12 spah ngut ki khynnah skul, pynkhuid ia ka sor Shillong

Shillong, 12 Nailar:
Na ka bynta ban pynlait ia ka jingjaboh bad ka jingtngit jong ka sor Shillong, ka sorkar ka la khot ia ki khynnah skul ban pynphriang ia kane ka khubor. Mynta ka sngi, 12 spah ngut ki khynnah skul na ki 70 tylli ki skul ha Sor Shillong ki la wan ban iashim bynta ha ka jingiaid paidbah ha sor ban pynher ia ka khubor sha phang ka jingdonkam ban pynkhuid ia ka sor bad ban leh khuid.
Ia kane ka jingiaid paidbah la pynlong da ka ophis jong u deputy commissioner ka East Khasi Hills lem bad ka North Eastern Region Capital Cities Development Investment Programme (NERCCDIP), State Investment Project Management Consultant & Implementation Unit (SIPMIU) and Urban Affairs department, ha U Soso Tham auditorium.
Ka myntri pynroi sor ka jylla ka Kong Ampareen Lyngdoh ka la maitphang ia kane ka prokram kum ka kongsan ba la don lang u Deputy Commissioner u Sanjay Goyal, u CEO ka Shil long Municipal Board u Bah E Kharmalki, u director ka Urban Affairs u B Dutta bad kiwei.
Ha kane ka prokram 93 tylli ki skul bad 5 tylli ki kolej ha kane ka nongbah ki la iashim bynta. Ha kane ka prokram 40 tylli ki skul ki la jied ban pynkhuid ia ki surok, ki lynti iaid, ki jaka shongkai bad ruh ka jingwah jingpynbna. Haduh mynta 5 tylli ki skul ki la pynlong ia ka jingjurip ia ki jaka theh nuit ha Marten ha Mawiong, ki park bad ia ka shnong Mawlynnong.
Ha kane ka sngi la sam khusnam da ka kongsan ia ki jingjop bapher bapher ha ka jingiakop dro, thoh ese bad kiwei. La pynlong ruh ia ka jingbam smai da u Sanjay Goyal u Deputy Commissioner ban pynkhuid ia ka sor.