Shillong:Ka Supreme Court myn hynnin ka sngi, ka la buh por ban ia kren ha ka 12tarik Naiwieng 2018, halor ka jingdon u dewiong, uba dang sah kut ha ki par bad uba dang dei ban die.
Ha ka jing bishar myn hynnin ka sngi, ka Kashari, ka pan jingshai na ka sorkar Meghalaya, ia u dewiong, uba dang don mynta ha ki par ha kylleng ka Jylla, hynrei ka sorkar Jylla, kam lah satia ban ai ia katei ka jubab bad kumta ka kashari, ka la ai por ba kin wan pynpoi ia baroh ka jingtip, kaba shai ha katei ka sngi ba la buh. Ka dewiong, ha ka por ba khang ha u snem 2014, kaba sah kut ha ki par, ka don shi klur, 20 lak ton bad haduh mynta pat, ym lah ban ioh jingtip, la ka don katno kaba la dep kit bad sa katno kaba dang don ha ki bar, hadien ba ka NGT, ka la ailad ban shalan ia katei ka mar.
Ha kawei pat ka khubor, U Ma Balious Swer, uba dei U Media Secretary jong ka State Coordination Committee of Coal Owners and Mine Dealers Forum(SCCOMDF), u iathuh ba na ka liang jong katei ka seng, ka la buh sa kawei pat ka jing ujor ha kashari halor ka jingtih ia u dewiong, ha kaba la dawa na katei ka kashari, ba kan ailad noh ban sdang ka jingtih dewiong ha ka Jylla. U Ma Swer, u ong ba ka sorkar Jylla lane ka sorkar India, ki dei ban pyllait noh ia ka jingtih dewiong bad ba kin buh ruh ia kita ki kyndon, na ka bynta ban pynkhuid ia ka mariang, katba kum ka jingkwah jong ka National Green Tribunal (NGT). Katei ka jingbishar kam pat wan satia mynta ka sngi bad U Ma Swer, u khmih lynti ba lehse kan lah ban wan ha katei ka sngi, ba ka la buh sngi da ka Supreme Court mynta ka sngi.
Kham mynshwa ha ka 31tarik Nailar 2018, ka NGT, ka la rai ban dang pynneh ia ka jingkhang dewiong ha ka Jylla bad ka kwah ruh ban don ia ka komiti ban khlieh da u nongbishar barim jong ka Guwahati High Court bad ba un tohkit halor ka kam tih dewiong bad ba un ai ia ka kaiphod jongu, sha ka komiti, ha ka 6tarik Lber 2019.