12 kynta khot pakhang shnong ka HNLC, ha ka sngi thep vote

Shillong,6 Iaiong:
Ka Hynniewtrep National Liberation Council ( HNLC) ka la pynbna da ka pakhang shnong ba 12 kynta ha ka sngi thep vote jong ka elekshon MP Lok Sabha 2014 ka ban long ha ka 9 tarik u ia iong,2014. Ka HNLC ka la pynbna ruh ba katei ka pakhang shnong kaba sdang naduh ka por 5 baje mynstep haduh ka por 5 baje janmiet kan treikam ha baroh kawei ka ka Ri Khasi bad Jaintia.
Ka kyrwoh ba la phah da u Publicity Secretary ka HNLC u bah Sainkupar Nongtraw ka la ong ba ka CEC jong ka HNLC kaba la long kyr kieh ha ka 1 tarik u iaiong ka tnad Political ka seng ka la shim ia ka rai ban boycott ia katei ka MP elekshon ka ban long h aka 9 tarik. Ka HNLC ka la kam ruh ba ha kane ka elekshon MP bun ki konstitwensi khamtam ha West Khasi Hills ki la shim ia ka rai ban ym thep vote bad ka la pynrem halor ka jingkynthoh u CEO ka tnad elekshon u P.K Naik uba la kynthoh ba ka ka sorkar kan phah kem ia kito ki ba pyrshah elekshon , ka kyrwoh ka la kam ba kitei ki jingkynthoh ki dei ki jingpynkhein ia ka hok ki paidbah.
Halor ka jingkhot pakhang shnong ha ka sngi thep vote, ka HNLC ka la kam ba haduh 67 snem mynta naduh ba ka India ka la ioh jinglaitluid , pynban kane ka Ri ka dang long mraw, ka la ong ruh ba ka sorkar India ka la phah soi jubor ia ki Dorbar hima bad ki Syiem ia ka instrument of accession and Anexed agreement 1948 da kaba pynap suloi ia ki. Ka kyrwoh na u bah Sainkupar Nongtraw ka la ong ruh ba ka HNLC ka pyrshah ia ka rukom sain hima sima jong ka India.
Ka HNLC ka la kam ruh ba jingwan tuid ki mynder sha kane ka Ri ka buh jingma ia ka jaitbynriew Hynniewtrep kaba lah ban duh noh ia ka jinglong ba kyrpang jong ka. Ka la pynrem ruh ia ka jingthung lat ha kane ka jylla kaba ka sorkar ka la thung da ki bym dei Khasi ne Garo, ka la ong ba kumno ki briew ki bym dei na kane ka jaitbynriew kin tip ia ki jingeh jong ka. Ka HNLC ka la kynnoh rurh ba ka sain hima sima ha ka ne ka Ri India ka dei ka jakhlia tam ha ka pyrthei baroh kawei, ka la ong ba ka seng kam shaniah ia katei ka rukom sain hima sima.
Ka HNLC, ka la kynthoh ruh halor ka jingpynslem ka sorkar ban pyntreikam ia ka ILP ha kane ka jylla bad ka la kam ba tang na ka daw ka jingpynslem ka sorkar ka la pynkhlain ia ka

seng ha kaba bun ki samla kiba la nang la stad bad kiba la shah ktah ki la wan ban pyngiasoh bad ka seng.Ka HNLC lyngba ka kyrwoh na u Publicity Secretary u bah Sainkupar Nongtraw ka la kyntu ia baroh ki paidbah ban ym ia shim bynta ha katei ka jingthep jied MP.
Halor katei ka jingpynbna pakhang shnong ba 12 kynta ka HNLC ha ka 9 tarik mynta u bnai, ka sngi thep vote ban jied MP, u Acting Chief Secretary ka jylla u PBO Warjri u la pyntip sha ki paidbah ba ka sorkar jylla ka la pynkhreh ia ki bor pahara ki ba biang na bynta ka jingiaid beit iaid ryntih ka elekshon. Mynta ka sngi u bah Warjri u la kular ruh sha ki paidbah ba ka sorkar ym tang ba ka pynbiang bor pahara ban peit ba ka elekshon kan iaid da kaba khuid ba suba hynrei kan iaid beit ruh jai khlem ki jingshah pynthut.