12 ka UDP, 2 ka HSPDP, kyrmen U bah Jemino ban jop u kyrtong RDA

Shillong:U General secretary ka UDP u bah Jemino Mawthoh ula ther ia u MP ka Congress u bah Vincent H Pala, uba la mihkhmat la 15 snem na Shillong Parliamentary constituency hynrei ki mat ka jaitbynriew pat thylli.

U bah Jemino ula iashim bynta ha ka jing ialang jong ki nongkitkam ka UDP bad HSPDP jong ki lai tylli ki konstitwensi kynthup ka Mawkynrew, Maw ryngkneng bad ka Nong krem ha ka jing ialang ha Smit ha kane ka sngi Saitjain.
“U bah Vincent H Pala ula mihkhmat la 15 snem na ka Shillong Parliamentary constituency, ki paidbah ki dei ban bishar, kiei kita ki kam ba khraw ba u MP u la leh, u la kren ha Parliament na bynta ka ri bad ka jaitbynriew jong ngi”, la ong u bah Jemino.

Haba kynthoh ba ka seng Congress, ka la nang tlot katba nang mih ki sngi, u bah Jemino u la ong ba ha kane ka elekshon MLA ba la dep, ka Congress ka don 5 ngut ki MLA kynthup tang 4 ngut na Khasi-Jaintia bad uwei na Garo, katba ka NPP ka jop 8 ngut na Khasi-Jaintia, ka VPP 4 ngut, ka HSPDP 2 ngut bad ka UDP ka jop 12 ngut ki MLA.
“Lada iakhein ia ka jingjop ki party ha ka MLA elekshon 2023, ka UDP ka jop bun ngut tam na Khasi-Jaintia Hills. Ngi don 12 ngut ki MLA ka UDP bad sa 2 ngut na HSPDP, ka jingiatylli mlon jong ngi, ngim artatien ban ioh ia ka jingjop ha kane ka kynti”, la ong u General secretary ka UDP.

Haba pynphai nia ia kiba kynthoh ia ka UDP kum ka party ba shu sdien bos, u bah Jemino u la ong ba, ha u snem 2013 ka UDP ka jop 8 ngut haba ka don ha ka liangpyrshah hynrei ha u 2018 ka hiar sha ka 6 ngut, bad ha u 2023 haba don ha ka liangsynshar, ka party ka la kiew sha ka 12 ngut. “Ha ka jingshisha, ngi shong ha ka liangpyrshah, ngi khlem shong bad ngi khlem sdien bos ha u 2013-2018, ngi la wanrah shibun ki mat ha ka iing dorbar bad ha 2018, ngi khmih lynti ba ngin nang kiew shuh shuh, phewse, ka UDP ka hiar sha ka 6 ngut, ka HSPDP ka hiar sha ka 2 na ka 4 ngut”, u la ong bad ula buh jingkylli, “Kaei ka jingkynnoh ba lada don ha tnum bos, kam myntoi ban kyrshan ia kita ki party?. Te, kaei pat kaba jia ha u snem 2023, haba ngi don ha ka liangsynshar, na ka 6 ngut, ngi la kiew sha ka 12 ngut”, la ong u bah Jemino.
U la ong ba lada kam don ka jingpynpait, ka UDP ka la ioh ban ialam ia ka bor synshar ha ka jylla bad kan long ka jingshngain ia ka jaitbynriew.