11tarik, ka sngi kaba iong, ha ka thain shatei lam mihngi, pynbna ka NESO

Shillong: Ka North East Students’ Organisation (NESO), kan pynlong ia ka 11tarik Nohprah 2020, kum ka sngi kaba iong, ha baroh kawei ka thain shatei lam mihngi.

Ha katei ka sngi, yn pynher ia ki lama iong ha kylleng ki jaka jong ka dong shatei lam mihngi. Ka dei ha ka 11tarik jong u snem ba ladep, ba la mynjur ia ka ain Citizenship Amendment Act (CAA) ha Parliament.

Katei ka dei ka jing pyntip, lyngba U Bah Samuel B Jyrwa, Chairman ka North East Students’ Organisation.

“Ka NESO, kan iai kynmaw ban pynlong ia ka 11tarik Nohprah, kum ka sngi kaba dum ia ka thain shatei lam mihngi” ong shuh ka khubor, na utei u nongialam ka NESO. La ong ruh ba katei ka jing kynmaw, kan pyni sha ka sorkar India, ba u paidlang ka thain shatei lam mihngi, u pyrshah jur ia ka ain Citizenship Amendment Act (CAA).