11 tylli ki jingkhawai iathoh, la pynsangeh noh, ong ka DC East Khasi Hills

Shillong: Ka Deputy Commissioner ka East Khasi Hills District, ka kong Matsiewdor N War ka la iathuh ba ha kine ki 15 sngi, la don kumba 11 tylli ki jingkhawai iathoh shong kurim ki ba la dep ban pan jingbit na ka ophis treikam jong ka DC, hynrei kine baroh la phah ban pynsangeh noh mynta shipor.

Kane ka long hadien ka jingkhang noh jong ka sorkar jylla ban ym shah ban khawai ha ki ar tylli ki District, kata ha East Khasi Hills District bad ha Ribhoi District na ka jingkiew sted ki nongpang Covid-19 ha kine ki ar tylli ki District. Ka DC, ka la ong ruh ba ki briew ki lah ban iathoh ha ki jaka mane Blei ha ryngkat ka jingbud ryntih ia ki kyndon ka tnad ka koit ka khiah, hynrei kin ym lah ban khot briew ne ban khawai.