11 tarik yn pynbna kyrtong MDC ka Congress na Nongshken

Shillong,
8 Kyllalyngkot:
Ka Election Committee jong ka Pynursla Block Congress Committee mynta ka sngi ka la ia shong pyrkhat halor ka mat tiket elekshon MDC na Nongshken Konstitwensi bad ha katei ka jingialang la ioh jingtip ba ka Committee ka la shim ia ka rai ban jied noh ia u kyrtong ka seng mynta hi ka taiew ha ka 10 tarik u kyllalyngkot bad yn pynbna paidbah ha ka sngi kaba bud ka 11 tarik.
Katkum ka tyllong khubor ba u nongthoh u la ioh lum, la ioh jingtip ba ha ka jingialang jong ka elekshon Komiti jong ka seng Congress kaba la long mynta ka sngi ha Pynursla la ia don baroh ki dkhot ka komiti bad ryngkat ruh baroh ki 5 ngut ki kyrtong kiba la pan tiket na katei ka seng na ka bynta ban ia khun ha kane ka MDC 2014 na Nongshken Conctituency.
Lah ban pynkynmaw ba haduh ba kut ka tarik ban thep ia ki aplikeshon aplai tiket Congress na nongshken Konstitwensi ki la don haduh 5 ngut ki kyrtong kiba la aplai bad kitei baroh 5 ngut ki dei ki radbah ka seng Congress kiba la iohi ruh ba ki dei kiba la wan rah jingjop ia u MLA ka Pynursla u Bah Prestone Tynsong ha kane ka elekshon MLA 2013. Ki 5 ngut ki kyrtong kiba aplai ia ka tiket Congress ki kynthup ia 3 ngut ki rangbah bad 2 ki longkmie. Haduh mynta ka jingtip ba la ioh lum la ia thuh ba ym lah ban ong shano ka lyer tiket ka kham noh namarba la ong ba ka lyer tiket ka beh mar katjuh katjuh sha baroh kitei ki 5 ngut ki kyrtong.