Ka jingplie u Myntri ka tnad ka koit ka khiah ka jylla ia ka Primary Health Care Centre (PHC) mynta ka sngi ha Khrang ka la pynkynmaw ieit ia u Myntri Rangbah ba rim ka jylla u Dr.F.A Khonglam (Bam kwai ha dwar u Blei) uba la buh ia u maw nong rim ban tei ia katei ka PHC kaba don mynta 10 jingthiah ha ki 11 snem mynshuwa ha u snem 2002.
La plie ia ka PHC ha Khrang da u Bah AL Hek Myntri ka tnad Health ha ryngkat ka jingiadonlang u MLA/MDC ka thain u bah T.W Chyne uba long u symbud kongsan, la ia donlang ruh ka DMHO jong ka tnad Health ka Dr.P.Dohtdong, Dr. W D Phira Joint Director Health and Family Welfare ,C V Diengdoh SDO (Civil) Sohra, ki doktor, Dr. D K Nongbri DMCHO East Khasi Hills, sordar , Rangbah Shnong, ki nongtrei jong katei ka PHC bad ki paidbah jong ka thain Khad-ar shnong.
Haba kren ha katei ka jingialang u Myntri u la ong ba katei ka PHC ba dang shu plie kam dei tang ka jong ka tnad ka koit ka khiah hynrei ka dei ka jong u paidbah, bad kum ka tnad kaba peit ia ka koit ka khiah u la ong ba kan ai ka jingshakri ym tang ha khrang hynrei ha baroh kawei ka jylla. U Myntri u la ong ruh ba ha ka jingshisha la dei ban plie ia katei ka PHC kham mynshuwa hynrei namar bym pat biang lut na dong shadong la pynkynriah noh ia ka sha kane ka sngi ba mynta. “Ngi kwah ban plie ia ka PHC hadien ba la dep ban pynbiang nadong shadong, ym ban khang biang hadien ba la plie ia ka”.
Hadien ba la ioh ia ka mat dawa na ki bor shnong ba dei ban weng noh ia ki nongtrei ba la thung 1 snem shiteng shuwa ban plie ia ka PHC u Bah Hek u la pynpaw ba ka shnong ka dei ban klet noh hynrei ban ia ai kti lang ban wanrah ia ka PHC kaba jop “Ia kaba la dep -la dep” ong u Bah Hek uba la pynpaw ruh ba ka ktah ia ka jingsngew briew ban pynduh noh ne ban knieh noh ia u khiew ja jong ki nongtrei kiba la thung ha u 2010 namar ka dei ka kam kaba ki la trei la shisnem tam . “Ia ka kam ka jam la dept hung ha u 2010 ha ka por ba ngam long u Myntri” ong biang u Myntri ka ka koit khiah uba la kular ba lada dang don kiwei pat ki kam kiba lait ha katei ka PHC nangne shakhmat dei ban ai sha ki trai shnong lada ka long kaba ki lah ban trei.
U MLA ka thain Bah Titos Chyne haba ai jingkren u la pynpaw ka jingsngewnguh ia u MLA barim ka Sohra u dr.F.A Khonglam uba la lah ban buh mawnongrim ia katei ka PHC ha ka por ba u la long u Myntri Rangbah ka jylla watla katkum ki jingshim jingkhein ia ka jingbun briew katei ka shnong kam pat dei ban ioh PHC. U la pynpaw ruh ba na ka liang jong u ruh kum u MLA u la shim ia ka jingkitkhlieh ban iai buddien ia katei ka kam tad haduh ba la lah ban plie ia ka mynta ka sngi.
Kiwei pat kiba la ai jingkren ki long u Myntri K.Nongrum na ka liang ka Hima Sohra, ki Sordar bad Rangbah Shnong jong ka Khrang bad ki shnong ba marjan, ki riew rangbah jong ka thain, u joint Director ka Health and Family Welfare,Dr.P.Dohtdong DMHO. La pyniaid ia ka jingialang da u Bah R.Wahlang EAC Sohra Civil Sub-division.
Phi don ban ong eiei?