Shillong: Ka Shillong Lajong ka la mad ia ka jingeh ha kane ka lumpung i-league hadien ba ka la shah rem biang ha ka Neroca FC ha ka jingiakhun mynta ka sngi ha madan Khuman Lumpak Stadium ha Imphal.
Ka Lajong ka la shah rem da 2-3 kol ha ka Neroca bad kane ka dei ka sien kaba 9 ba ka Lajong ka la shah rem na ki 11 sien ialehkai ha kane ka lumpung.
Ha ka jingiakhun, ka Neroca ka la pynkhih jar nyngkong ha ka 8 minit lyngba ka bol shu buh ne penalty ba la kynjat da u Yusa Katsumi hynrei tang ha ka 21 minit, ka la ioh biang ban pynkiew jingkhein da u Subash.
Ka Shillong Lajong ka la ioh mynsiem khyndiat hadien ba ka la ioh ban shut da ka bol shu buh da u Sheen Sohktung ban pynduna nam tam ia ka Neroca bad kane ka la jia ha ka kyllamiet jong ka 53 minit.
Hynrei ha ka 55 minit, u nongialehkai ka Neroca u Malemnganba Meite u la ioh ban pynkhih biang ia ka jar da ka jingbakla u nongialehkai ka Lajong u Aiban Dohling bad kane ka la pynlong ia ka Neroca ban kiew jingkhein sha ka 3-1 kol.
Hynrei ka Lajong ka la lah ban pynphai biang kawei ka kol da u Phrangki Buam ha ka 89 minit hynrei namar ba ka la slem, kam lah shuh ban leh eiei bad hap wan phai iing thylli bad ka jingialehkai ka la kut hapdeng ka jingkhein 3-2.
Ka Shillong Lajong kan pynkhreh ban iakhun biang ia ka jingialehkai ha la iing pyrshah ia ka Indian Arrows ha Shillong ha ka 13 tarik Kyllalyngkot ha madan JN Stadium por 2PM.
Haduh mynta ka Lajong ka kamai tang 4 point na ki 11 sien ialehkai ha kane ka lumpung bad khlem pep, lada ka jop lashai ka don jingkyrmen ban kiew kyndon kham shalor.