Ka KSU jong ka South-West Khasi Hills District ka la pynbna da ka jingiakhih da ka pakhang ophis ha ki lai tylli ki Block kiba kynthup ia ka Mawkyrwat, Ranikor kiba hap hapoh ka south west khasi hills bad Mawsyn ram kaba hap hapoh ka East Khasi Hills District. Kane ka jingpakhang ophis kan long ha ka 11 bad 12 tarik jong mynta u bnai.
Haba pynbna ia kane ka jingiakhih u samla Robertjune Kharjahrin General Secretary, u la ong ba ka seng ka hap ban shim noh da kane ka synjam namar ba ka sorkar kam shimkhia halor ka jingpynbha ia ka surok naduh Borsora haduh Nongjri.
Kane ka dei ka sien ka ba ar ba ka KSU ka pynbna ia ka jingiakhih hadien ba ka ladep pynlong da ka pakhang surok kaba 48 kynta naduh 21 haduh 23 tarik u bnai Jymmang.
Kane ka jingleh bym suidniew jong ka sorkar ka pynpaw shai ba ka niewbein ia ki paidbah jong ka thain baroh kawei.
U samla Kharjarin u la ong ba ka surok jong kitei ki shnong ki la sniew shaba palat haba ia nujor bad kiwei ki surok jong kiwei ki shnong. Ka jingsniew jong ka surok kala pyndik ia ka leit ka wan jong ki paidbah khamtam ia ki paidbah kiba don ha ka pang ka shitom.
Ha kawei kaliang ruh u la iathuh ba ka jingsniew khlemakor ka surok ka la ktah jur eh ia u ba duk ba suk namar ba ka bai kali ka ba ju shim T.350 la hap ban pynkiew sha ka T.800 nalor kata ruh naduh ki mar bam mar dih ruh la kiew dor kum u khaw u ba shongdor T.25 u la kiew sha ka dor T.80 .
Shuh shuh u la ong ruh ba hadien ka pakhang ophis ka seng kan pynlong sa ka jingialang paidbah ha ka 15 tarik mynta u bnai. Hadien ka jingialang paidbah lada ka sorkar kam lah ban leh eiei halor kane ka seng kan shim da ka rai jong ki paidbah.
Na ka liang jong ka seng ka la kyntu ia baroh ki paidbah bad ki nongtrei sorkar ba kin iasnoh kti lang ha kitei ki jingiakhih ba la buh ban pynlong khnang ba kan longka jingmyntoi na ka bynta jong ki.
“Ka seng kan nym treh ban iakren bad ki ba hapoh sorkar lait noh lada ka khot ban iakren bad ki ba halor jong ka sorkar”, la ong u samla Kharkarin.
Phi don ban ong eiei?