10tarik Nohprah, yn leit rah ia ka ain CAB ha Parliament

Shillong: Ka sorkar India ha ka jing ialam jong ka Bharatiya Janata Party (BJP) ka lah ban rah ia ka Citizenship Amendment Bill (CAB) ha ka 10 tarik Nonprah 2019 ha parliament bad ban pyrshang ruh ban pynlong ain noh ia ka. Ia kane ka kyrwoh lah wanrah da u Dr. Himanta Biswa Sarma u ba dei ruh u Myntri Pla Pisa jong ka Jylla Assam bad na ka seng BJP.

Na ka liang u Myntri ka kam pohing ka sorkar kmie U Amit Shah ha ka por ba ia kren bad ki nong ialam na shane ka thain lammihngi u lah pynpaw ba kane ka Citizenship Amendment Bill (CAB) kan dei ka ba thymmai bad kan iapher bha bad ka Bill ka ba na 2016. “Ha ka por ba ia kynduh bad ki nong ialam jong ka thain lam mihngi, U myntri ka pohing u Amit Shah u ong ba ka CAB kan nnym trei kam ha ki jylla ba don Inner Line Permit (ILP) bad ki jylla ba hap hapoh ki 6th schedule” lah bynrap u Dr. Himanta Biswa Sarma.

Ka North East Students’ Organisation (NESO) ka dawa na ka Sorkar India ban pyniaid kam ia ka Inner Line Permit (ILP) bad ka National Register of Citizens (NRC) ha baroh ki jylla ka thain lam mihngi. Ka NESO ha ka jing ia kynduh ia u Myntri kam pohing ka sorkar kmie U Amit Shah ka lah kyntu ia u ban sngap ia ki jing dawa ki paid na kane ka thain da kaba pyndam noh syndon ia ka Citizenship Amendment Bill (CAB).

Nalor ka ILP bad ka NRC ka seng ka la dawa ruh na u Myntri kam pohing ba dei ban pyllait ia ka thain lam mihngi (North East India) na ka Indo-Nepal Treaty of Friendship, 1950.
U President jong ka NESO Samuel Jyrwa u lah ong ba ka seng bad baroh ki paid kane ka thain ki ieng pryshah ia kane ka Bill namar kadei ka bill ka ba ktah ia ki jylla baroh ka thain lam mihngi. “Ladaka sorkar kmie kan wanrah ia kane ka bill, ngi ngin long stang ki rit pait ha jaka lajong ruh namar ka sorkar ruh kan nym lah ban tehlakam katno ngut kin wanrung sha kane ka thain” lah bynrap u Samuel Jyrwa.
Ka seng North East Students’ Organisation (NESO) kadei ka shatri jong jong bun tylli ki sengbhalang jong ka thain lam mihngi.

Kum ban shu pynkynmaw lah don kumba 50 tylli ki liang pyrshah na kane ka thain ki lah shah khot da u myntri kam pohing ka ri, u Amit Shah ban iathir halor ka jing pyrshah jong ki ia ka CAB.