10hajar ngut, kin shim bynta ha ka jingialang U Modi ha Polo

Shillong: Ha shwa jong ka jingialang jong ka North Eastern Council, kaba dei ban long lashai ka sngi U Blei ha Shillong, kumta, mynhynnin ka seng ka ophis jong ka NEC, ka la pynmih ia ka kyrwoh, ha kaba ka batai ba la seng ia ka North Eastern Council (NEC) lyngba ka Act jong ka iing dorbar thaw ain Parliament ha u snem 1971. La plie paidbah ia ka ha ka 7 tarik u Naiwieng, 1972 ha nongbah Shillong bad ka la dap 50 snem ha u Nai wieng 2022. Ha ka jingialang Plenary kaba 70 ha nongbah Guwahati ha u Risaw 2022 kaba la pynlong hapoh ka jingpyniaid u Myntri Kam Pohiing bad shongknor ka NEC, la rai ba yn rakhe ia une u maw mer jong ka NEC ha ka rukom ba iahap. Kumta, ia ka jingrakhe Golden Jubilee jong ka NEC yn pynlong ha nongbah Shillong ha ka 18 tarik u Nohprah 2022 ha kaba yn don ka jingialang jong ka NEC bad ruh ka jingialang paidbah. Ia ka jingialang ka NEC yn pynlong ha ka State Convention Centre Auditorium, ka jingialang paidbah kan long ha madan Polo, Shillong.

U Myntri Rangbah Duh, u Narendra Modi un wan iashim bynta ha kine artylli ki jingialang ha ryngkat baroh ki Dkhot ka NEC kiba kynthup u Myntri Sorkar Pdeng ba dei khmih ia ka tnat Kam Pohiing, ki Myntri DoNER, Ki Lat bad ki Myntri Rangbah jong ki jylla ka thain shatei lammihngi, ki myntri Sorkar Pdeng kiba dei na ka thain shatei lammihngi, ki MP bad ki MLA bad ki dkhot ka NEC. Shuh shuh, la khot sngewbha ia ki Chief Secretary jong ki jylla, katto katne ki Secretary jong ki tnat Sorkar Pdeng, ki ophisar na ki jylla ka thain shatei lammihngi bad ki longkhlieh jong ki jaka trei bapher bapher ba la seng da ka jingkyrshan jong ka NEC. Na ka bynta ka jingialang paidbah, ha ryngkat ki paidbah, ki riew mihkhmat, kito kiba trei bha ha ki kam bapher bapher, ki nongmihkhmat na ki Self Help Group, ki kynhun jong ki nongrep na baroh phra tylli ki jylla ka thain kin wan iashim bynta. La antad ba yn don kumba 10,000 ngut ki briew ki ban wan iashim bynta ha kane ka jingialang paidbah.

Ha kane ka sngi, u Myntri Rangbah Duh un plie paidbah ia katto katne ki projek kiba kongsan ha ka thain kiba kynthup ia ka Indian Institute of Management (IIM), Shillong, un aiti ia ki tower 4G ha Meghalaya, un plié paidbah ia ki projek NEC bad ki projek ka jylla Meghalaya bad un buh maw nongrim ruh ia katto katne ki projek. Yn pyllait paidbah ruh ia ka ‘GOLDEN FOOTPRINTS’, ka kot kaba pyni ia ki jingtrei ka NEC na ka bynta ka roi ka par ha ka thain shatei lammihngi ha kine ki 50 snem ba la dep ha kane ka jingrakhe ia ka Golden Jubilee. Ki jingthoh ha kane ka kot ki dei kiba la ioh na ki jingtip kiba don ha ka Council bad na ki jingtip kiba don bad ki phra tylli ki jylla jong ka Council bad ka don ruh ia ki dur jong ki kam ka roi ka par bad ka jingwanrah ia ki jingdon jingem ha ka jingkyrshan jong ka NEC ha kine ki por ba la dep.
La kyrmen ba kane ka Jubilee kan ai ia ka rynsan ba thymmai ia ka NEC ba kan trei kham bha shuh shuh ha ki por ki ban wan, bad ban wanrah shuh ia ki kam ka roi ka par kumba ka la leh ha kine ki 50 snem ba la dep ha kylleng ki phra tylli ki jylla ka thain shatei lammihngi.