10baje mynmiet, la hap khang dukan, ong ka hukum ka DC Shillong

Shillong:Ka Deputy Commissioner jong ka East Khasi Hills District, ka kong R.M Kurbah IAS, kaba dei ruh ka District Magistrate, katkum ka bor ba la bynshet ha ka la pynjari ia ka Section 144 CrPC, la khang ban plie dukan ka long tang hapoh ka 10 baje mynmiet.

Ka jingbam bad dih ia ki jingdih pynbuaid ha ki kali, kiba lah ban wanrah ia ki kam pynkheiñ ain ha ki kali la khang pyrshah, ka jingpyntem jingrwai ryngkat ki sur ba sawa jam ka khang pyrshah hajan ki jaka pule, jaka ai jingsumar bad ha ki shnong ki thaw ha ka por 10 baje mynmiet la khang pyrshah.

Kane ka jing pyrkhing jong ki bor pyniaid distrik, ka dei hadien ba la iohi ia ki katto katne ki jingjia ha Nongbah Shillong kiba la wanrah ia ka jing pynkheiñ aiñ khamtam ha ka por mynmiet kaba la pynthut, buh jingma bad ka ba pynsyier ruh ia ka jingim jong u babun balang.

Kino kino kiba pynkheiñ ia kane ka hukum kin ngat ha ka kyndon ain section 188 jong ka indian penal code.
Kane ka hukum jong ka District Magistrate kan treikam pura naduh ka 12 tarik naitung bad kan kut pat ynda la pynmih pat da kawei ka hukum.