1098 ngut set ka Mizoram Police, beh 92 ngut na bym don ILP

Ki pulit ka jylla Mizoram ki la kem bad set ia ki 1098 ngut ki mynder ka thaiñ ka shatei lamihngi namar ka jingrung kyrthlep jong ki shapoh ka jylla khlem ki kot ki sla kiba biang kum ka Inner Line Permit (ILP) bad ha kajuh ka por la beh ia ki 92 ngut sha jylla Assam, la iathuh ki polit rangbah ka Mizoram mynhynin ka sngi Thohdieng.

U Deputy Inspector General jong ki Pulit (Northern Range) u Lalbiakthanga Khiangte, u la iathuh ba la ioh kem bad set ia ki naduh ka sngi Palei bad la phah bianh ia ki sha jylla Assam ha ka sngi Thohdieng.

U la iathuh ruh ba haduh 81 ngut la iohkem da ki pulit ka shnong Bairabi bad 11 da ki pulit ka Vaireng jong ka district Kolasib kaba don mar khappud bad ka Assam.

U la iathuh ruh ba, ia kiba sah pat, yn sa wallam ha khmat jong ka iingbishar jong ki district bapher bapher.

U la iathuh shuh shuh ba haduh 865 ngut la set phatok ha Aizawl district, 111 ngut ha Kolasib district, 52 ngut ha Mamit district mar khappud bad kaTripura, 43 ngut ha Mizoram’s Serchhip district bad 27 ngut ha Champhai district.