Ngim dei ban jied, hadien ba ngi la shah thied

Ngi dei ban buh ka thong ban wanrah ka lawei baphyrnai na ka bynta ka jylla hi baroh kawei, kum ki nongshong shnong ngi dei ban kloi ban rai ban jied ia ki candidate kiba ngi ikop ban long ki nongialam ki ba lah ban shakri ia ki paitbah.

Ngim dei ban jied hadien ba ngi la shah thied, bun na ngi, ngi ong ngan thep vote ia uba pynsiew bai kot skul, don pat kiba ong ngan thep vote ia uba iarap ia nga ban shna iing, don pat kiba ong ngan thep vote ia uba iarap ban siew bai hospital bad kumta ter ter. Baroh kine ki long ki jingmyntoi shimet, ngi dei ban buh jingkylli lada baroh ngin thep vote na ka bynta ka jingmyntoi shimet mano ban thep vote na ka bynta ban ioh ka hospita ka babha, mano ban thep vote na ka bynta ban ioh ki surok kiba bha mano ban thep vote ban ioh ki skul bad ki college babha mano ban thep vote ban ioh ia ka synshar khadar kaba khuid.

Ngi dei ban pyrkhat na ka bynta ka myntoilang namar ba bun sien ngi don ka jingsngewthuh ba bakla, don kiba ong lada nga kyrshan ia u Candidate No.1, ngam donkam shuh ban bylla, don pat kiba ong lada nga kyrshan ia u Candidate No.2, ngam donkam shuh ban leh ia kine ki kam kiba jynjar mynta, hynrei kaei kaba ngi dei ban leh man ka sngi lada jop u No.1 lane No.2 ruh ngi dei hi ban leh, uba rep kba u dei hi ban rep kba, uba bylla u dei hi ban bylla, uba hikai skul u dei hi ban hikai skul bad kumta ter ter.

Te hynrei lyngba u Nongmihkhmat uba ngi jied ngi wanrah ia ka roi ka par kaba ktah lang ia ngi baroh kum ka imlang sahlang bad ka jingkylla ka dei ban wan na ngi shimet shimet, ka jingpynthame lyngba ka pisa, lyngba ka jingpyndih buaid, lyngba ka jingpynleit Excursion, lyngba ka jingpynleit picnic bad kumta ter ter ki pynthame ia ngi, ngi kloi ne em ban ong ba ngam dei ban shah pynthame, ngi kloi ne em ban ong ba ngam dei ban shah pynbiej, ngi kloi ne em ban ong ha ki khun ki kti rai bud bad jied ia u candidate u briew uba sngewthuh bad uba kloi ban shakri, jied ia u briew uba lah ban long kum u nongialam (Leader) namar ngi donkam ia ki nongthaw ain hapoh iing dorbar (Assembly) kiba don ka sur ban kren bad ban iasaid na ka bynta ki paitbah ym ia ki mahajon, hehspah, businessmen, ban ia bate pyniaid kam hapoh iing dorbar, dei mangi ki ban rai ngi kloi ne em ban wanrah ia kata ka jingkylla da kaba sdang na lade shimet.
Nongthoh
Albert Maring