Nongpoh: Ki riew kylluid mynsiem na ka shnong Umroi Nongrah ha ryngkat ka jingiatreilang bad ki bor shnong ka Umroi Nongrah, mynha ka sngi Thohdieng, ki la pynlong da ka jingsam khaw sha ki palat 104 tylli ki longiing ba duk, kiba don ha ka katei ka shnong.
Ha katei ka sngi, kaba la pynlong ia katei ka jingsam khaw, la sakhi da ka jingdon u Bah Prestingroy Dkhar, uba dei u Rangbah shnong ka Umroi Nongrah, u Bah Poipynhun Rynghang, Secretary shnong, u Amit Sinha, IC ka Khapmara PIC lem bad kiwei de ki rangbah ka shnong Umroi Nongrah.
Lyngba katei ka jingsam mar bam sha ki Longiing baduk, ki bor pyniaid shnong ka Umroi Nongrah, ki la sam ia ki mar bam kiba kynthup ia u u Khaw, ka Mluh, ki Jhur lem bad kiwei.
Haba iadei bad katei ka sam mar bam, u Bah Prestingroy Dkhar, u la ong ba katei ka kam ka la urlong, ka dei hadien ka jingdon jong ki katto katne ngut ki riew kylluid mynsiem na katei ka shnong, kiba la kloi ban iasei pisa ban thied ia kitei ki mar bam, khnang ban ioh pat ban sam sha kito ki longiing kiba donkam shisha ia ka jingiarap.
Kumba la mad lem da ki longiing baduk ha kiwei pat ki shnong, utei u rangbah u la ong ba ki don shibun ki longiing baduk ha katei ka shnong, kiba la shem jingeh ban ioh ia ki mar bam bad kata ka long ba kim don pisa shuh ban thied ia ki mar bam, namar ki dei tang kiba briew kiba im da kaba shu bylla sngi.
Phi don ban ong eiei?