101 ngut, saw bnai ym ioh tulop ki nongtrei DMHO

Shillong, 27 Naiwieng:
101 ngut ki nongtrei Casual Labourer kiba trei hapoh ophis jong ka District Medical and Health Officer (DMHO) Ri-Bhoi District kiba trei ha ki Hospital bapher bapher ki khlem ioh tulop la saw bnai mynta kata naduh u Nailar,2014 haduh mynta. Katei ka jingshah set tulop ka la ktah ia ka ing ka sem jong kitei ki 101 ngut ki nongtrei Labourer.
Halor katei ka jingbym ioh tulop ka Hyn niewtrep Youth Council, North Khasi Hills District hapoh ka jingialam u samla Amberlight Masharing, President HYC, North Khasi Hills District ha ka jingiadonlang kiwei pat ki dkhot ha ka mynta ka sngi ki la leit ban ia kynduh ia u Director jong ka Directorate of Health Service ( MI) ha Shillong ban ia kren halor katei ka jingbym ioh tulop. Ha katei ka jingiakynduh u Director u la kular ban shimkhia ban pyllait noh ia ka tulop kitei ik 101 ngut ki nongtrei ha kine ki khyndiat sngi, bad na ka liang ka HYC ka la ong ba kan iai buddien ia katei ka kam. U Director u la batai ruh ha ki nongialam katei ka seng ia ki jingeh ba ka tnad kam shym la lah ban pyllait ia ka tulop ki nongtrei.
Ha ka kyrwoh ba la soi da u Publicity Secretary ka HYC u bah Rofling Lyngdoh ka la ong ba ka HYC ka la dep ban ia kynduh ia u DMHO-Ri-Bhoi ban kyrpad ban pyllait noh ia ka tulop ki nongtrei, bad dei hadien bym shym la seisoh katei ka jingiakynduh ki la leit ban ia kynduh ia Director ha Shillong.