Shillong, 19 Risaw:
Mynta ka sngi ka 19tarik Risaw, 2016 kumba shispah ngut tam ei ei ki Nongkitkam jong ka Mawsynram Block Congress Committee ha poh ka jingialam u President ba thymmai jong ka u Bah Khelor Kharnaior, ki la leit ban ia kynduh ia u Dr.D.D.Lapang, President ka MPCC ban leit ai khublei ia u namar ka jingthung ka MPCC ia u Bah Khelor kum u President ba thymmai jong ka Block.
Ka Mawsynram BCC ka la pynpaw ia ka jingkmen bad pdiang da ka jingsngewnguh ia ka jingleh jong ka MPCC.
Ha kane ka jingialang la ioh jingkren lyngkot na u Bah Kansing Lynshiang, u Bah MB.Rodborne bad na u Bah Khelor Kharnaior President Masynram BCC.
Ha ba kren kum u President jong ka Mawsynram BCC u la ai khublei ia u President ka MPCC u Dr.D.D.Lapang, bad ia ka MPCC hi baroh kawei namar ka Block ka ba thymmai hadien ba u Bah PN Syiem u MLA ka Congress na Mawsynram u la pynpaw pyshah ia ka Seng Congress bad kum u President ba thymmai u la kular ban trei shitom ban wanrah ia ka jingiatylli ia ka seng ha ka Mawsynram BCC.
La ioh jingkren na u Bah Lapang, bad ha ka jingkren jong u, u la pynshai ba la buh ia u bah PN Syiem ha ka jing sospon, kam dei ka jingleh ka ba kyrkieh jong ka MPCC, hynrei ka dei hadien ba ka MPCC ka la iai ap slem bha, bad hadien ba ka AICC ka la phah ia ki nongpeit pyrman ha ka ba ka la phah ia u heh ka AICC, U V.Narayanasamy, bad hadien kata ka la phah sa ia u Dr.C.P.Jopshi,kum u nongpeit ka AICC bad ka la phah kyrpang ruh ia u Mukul Wasnik.
Hynrei hadien kane na ka liang u Bah PN Syiem u la kren pyrshah ia ka seng bad ia ka sorkar ba la ialam da ka Seng Congress ha ki jingialang paitbah bad ha ki kot khubor, bad ruh ba u la pynpaw ba un shong khop bad nym leit na ka bynta ban canvas ia ka election MDC shiteng samoi ka ban sa long shen ha u bnai Nohprah mynta ka snem, bad ka jing ong jong u ba kiwei ki kam ki long ha khmat bad ka party Congress ka wan hadien, bad kiwei ki jingleh jong u ha ka ba um ju wan shuh sha ki jingialang ka seng bad sha ka jingialang jong ka Congress Legislature Party (CLP), kumta ka MPCC ka la shim ia kane ka rai ban thung noh da uwei u Pesident ba thymmai ban pynkhlain ia ka seng congress ha Mawsynram BCC.
U la pynkynmaw ruh ba ka jingkren jong u Bah Pala MP, kam long ka ba shisha ba ka por kam pat dei bad ban ap shwa katto katne por, hynrei u Bah Lapang u ong ba ka MPCC ka la ap slem bha ia ka jingkylla ka jong u, bad u la ong ruh ha ka jingshisha u Bah Pala u la dei ban wan ia kynduh shwa ia u, ym ban leit sha ki kot khubor lane ban leit beit sha U Vice President ka AICC u Rahul Gandhi khlem da iasyllok shwa bad u president jong ka MPCC, u la ong ba ka jingleh u bah Pala u ba dei u MP ka Seng Congress, ka long ka ba bakla.
Ha kane ka juh ka sngi ka Mawsynram BCC ka la leit ban ai khublei ruh ia u Working President ka MPCC u Bah James S.Lyngdoh bad ban ia kren ruh ia ki kam ka Party ha ka BCC.
Phi don ban ong eiei?