New Delhi, 10 Jylliew:
La antad ba kumba 100 ngut ki lehnoh ki la kyllon iap na ka kynhun seng lehnoh bapher bapher ha ka thain shatei Lam mihngi ha ka jinghiar thma ki shipai khyndew, hynnin bad haduh mynta ka sngi ha ki thain jong ka Myanmar kaba don ha khappud bad ka Manipur, iathuh ki lad khubor na ka tnad pohiing ka sorkar pdeng.La ong ba ki shipai ki la ther khlem sangeh kumba 45 minit eiei ha ki jaka ba la suba ba ki dei ki ktem lehnoh.
La ong ba ha katei ka jingleit hiar thma ki lehnoh kim shym la nud ban ia leh pyrshah ia ki shipai bad ym shym la don ba pynphai kuli tang shi kuli ruh. Ki don 6 ngut ki dkhot lehnoh kiba la mynsaw jur bad la pynkit ia ki sha jaka sumar. Ha khappud bad ka Nagaland ki shipai ki la ioh khyrwit 15 ngut ki lehnoh bad ki la kyllon iap ha shen. Katei ka jinghiar thma ki shipai ka la sdang naduh mynta ka step ha ka por 3 baje eiei hynrei ki bor na India kim pat lah ban jingtip sha Myanmar namarba ka dei ka por ba ki nongtrei kim pat long trei, dei kham hadien ba la pynpoi jingtip bad la iathuh ba ha kane ka taiew ki la don 30 ngut ki shipai kiba la shah siat iap ha ki lehnoh bad ki sa pynlong ia katei ka jingkhynra lehnoh.
U myntri ba dei peit ia ka Information and Technology ka sorkar pdeng u Rajyavardhan Singh Rathore, u la iathuh sha ki lad khubor ba la pynlong ia katei ka jinghiar thma hadien ba la ai hukum da u myntri rangbah duh ka ri u Narendra Modi, uba la ong ba ka jingshah hiar thma ki nong India la ka long ha Iraq ne ha Yemen ka long ka bym lah ban pdiang, “Kane ka dei ka khubor ia ki ri ba marjan kiba ri ba kdup ia ki seng lehnoh” ong u Rathore. Ka India ka la shim ba katei ka jinghiar thma jong ka ia ki lehnoh ka long kaba jop, bad haba kren sha ki nongthohkhubor ha ki ar tylli ki jaka ha Tuensang , Nagaland bad Ukhrul Manipur, u Major General Ranbir Singh u la phla ba la pynlong ia katei ka khynra dei na ka jingpynshit ki seng lehnoh da kaba siat iap ia ki shipai India.
Hadien ba ki shipai India ki la hiar thma bad pynkyllon iap ia ki spah ngut ki lehnoh ka thain shatei Lam mihngi ha ka jinghiar thma ha ki khappud ka Myanmar bad hadien ba u myntri ka sorkar India u Rajyavardhan Rathore u la kynthoh ba ka jinghiar thma ka india ban khynra lehnoh ha ki khappud bad ka Myanmar kan dei ka nuksa ia kiwei pat ki ri ba marjan, u myntri ka sorkar Pakistan u la kob da kaba ong ba ka India kam dei ban shim sting ia ka Pakistan namar ba ka Pakistan kam dei kum ka Myanmar kaba ki lah ban leh katba mon, “Ka Pakistan kam dei ka Myanmar” ong u Chaudhry Nisar Ali Khan, uwei na ki myntri ka sorkar Pakistan.
U Nisar u la ong ba kito kiba thmu ban tur hapoh u pud u sam ka Pakistan da ka jingmut ba sniew ki dei ban khyllie la ki khmat bad pynshah bha la ki shkor ba ki shipai Pakistan ki long kiba la khreh ban jubab kylla. “Kito kiba sdang ban tam pud ha Pakistan, ki dei ban tip ruh ba kin ioh ia ka jubab kaba biang” ong biang u Nisar uba la bynrap biang da kaba ong ba ka India ka dei ban tip ba ka Pakistan kam dei kum ka Myanmar.
U la ong ba ka jingtam pud ia u Line of Control, bad ki jingkynthoh kiba aiding bad kynshoit ki dei ki jingkren kiba khlem sangeh da ki myntri ka sorkar India, “Ka Pakistan kam ym shah ktah ia ki jingkren kynshoit ba man ka por ki myntri ka sorkar India” u la ong. U la ong ruh ba ka Pakistan ka dei ka ri kaba kwah shongsuk hynrei kam lah ban pdiang ia ka jingwan thombor, “Ka India ka dei ban sangeh ka pyrkhat ramia shaphang ka Pakistan” u la ong biang.
Kham mynshuwa , u Sartaj Aziz, u nongai buit ia u myntri rangbah duh ka Pakistan u Nawaz Sharif u la dawa na ka international community bad United Nations ba kan leh eiei halor ki jingkynthoh u myntri rangbah duh ka ri India u Narendra Modi ha Bangladesh. U Aziz u la ong ba kiba kum kitei ki jingkynthoh ki wanrah jingartatien ba ka India kan don jingiadei bad ka Pakistan, u la ong ruh ba ka Pakistan kan leh katba dodn ka bor ban pynpaw ia ka buit ka India ban pyniapait ia ka East Pakistan ha u snem 1971.
U la pynpaw ruh ka jingsngew diaw namarba u Modi u la jied ia ka Dhaka kum ka jaka ban pynpaw ia kitei ki jingkynthoh jong u “Ka dei ka jingthmu ban bet ia u symbai pyn iaisih hapdeng ka Pakistan bad ka Bangladesh, namar ba kitei ki ar tylli ki ri ki dei na ka juh ka niam, bad kiba ia khih lang ban ioh jinglaitluid” u la ong.
Katba ka Myanmar pat ka la kyntait ba ki shipai India ki la wan ban hiar thma ia ki lehnoh ka thain shatei Lam Mihngi hapoh u pud u sam jong u Zaw Htay u Director ka Myanmar Presidential Office u la pynmih jingthoh ha ka Facebook ha kaba u la ong, “Katkum ka jingtip ba la phah da ka Tatmadaw (ki shipai Myanmar) battalion kiba dei ki shipai khyndew, ngi la ioh jingtip ba ki shipai India ki leh ia ka kam khynra lehnoh tang hapoh u pud u sam jong ki uba don ha khappud bad ka Myanmar”. Shuh shuh u la bteng da kaba ong “Ka Myanmar kam ailad bad kam pdiang ia kino kino ki ri nongwei kiba thombor ia ki ri ba marjan na shadien bad pynmih jingkulmar da kaba pyndonkam da ka jaka jong ngi” u la ong. Katei ka jingkynthoh ka la mih hadien ba uwei na ki myntri sorkar ka India u la kam ba ki shipai India ki la leit ban hiar thma ia ki lehnoh hapoh u pud u sam ka Myanmar bad ki la ioh pynpra ar tylli ki ktem jong ki.
Phi don ban ong eiei?