Shah siat iap, sa uwei u heh duh shipai; ka Russia, ka la duh ia 15ngut ki heh shipai ha Ukraine

Ka Russia, ka la duh sa uwei u heh shipai jongka, hynnin ka sngi bad mynta katei ka Ri, ka la duh ia 15ngut ki heh duh shipai jong katei ka Ri, naduh ba ka leit hiar thma ia ka Ukraine.

U Colonel Alexei Sharov, u dei uwei na ki heh shipai jong ka Russia, uba la khlad noh, ha ka jingshah siat, hynnin ka sngi ha ki shipai ka Ukraine bad kane ka dei ka jingduh kaba jubor shibun, kaba la palat na ka jingiap ki heh shipai naduh ka thma bah ba ar. Ia ka jingiap utei u heh shipai, la pyntip, da ka Ukraine, hynnin ka sngi.

U Sharov, u dei u heh duh jong ka 810th Guards Separate Order jong ka Zhukov Brigade jong ka Russian Marines bad ula shah pyniap ha Mariupol, ka nongbah, kaba la shah kerkut ki riew paidbah, kumba shilak ngut, ha ki shipai jong ka Russia.

Haduh ka 19tarik Lber 2022, ki don 902 ngut ki riew paidbah, kiba la iap bad sa 1,459 ngut kiba mynshaw ha Ukraine, ong ka khubor jong ka UN human rights. Shiphew million ngut, ki briew ki la shong khlem iing khlem sem bad sa 3.4 million, ki la phet noh, na katei ka Ri, ong ka khubor jong ka United Nations.