Kam ka Russia, ba ki la iap 10hajar ngut ki shipai ha ka thma ha Ukraine

Moscow: Ka Russia, ka la duh ia 10,000ngut ki shipai, ha kine ki saw taiew ba ladep, ka jingleit hiar thma jongka ha Ukraine.

La pyni ia ka jingiap jong kitei ki shipai, da ka website, kaba la pyniaid da ka sorkar Russia hi; hynrei, la weng noh kham hadien ia katei ka jingkhein. La ngeit ba ia katei ka jingkhein, la thep ha ka website da u nongtrei jong ka Russia, uba ia shah ia ka Ukraine. Kham mynshwa ka Russia, ka kam, ba ki don tang 498 ngut ki shipai jongka, kiba iap bad katei ka dei ha ka 2tarik Lber 2022.

Katei ka jingkhein, ka pyni, ba ki don 9,861 ngut ki shipai kiba iap ha Ukraine bad sa 16,153 ngut kiba mynsaw. Kham mynshwa ka Soviet Union, ka duh ia 15hajar ngut ki shipai jongka, ha ka por ba ka hiar thma ha Afghanistan, ha u snem 1979, ha kaba katei ka thma, ka neh haduh 10 snem kynthih.

Ka Ukraine, ka ai jingkhein, ba ki shpai jong ka Russia, kiba iap, ki la poi mynta sha ka 15hajar ngut, katba ka US, ka ai jingkhein ia 7hajar ngut.