10 tarik, yn leit jubab ki trai Taksi sha ka sorkar

Shillong, 8 Jylliew:
Kumba 500 ngut ki trai ki kali kamai (Local Taxi), ki la wan sha ka jingialang ba la khot da ka East Khasi Hills Local Taxi Welfare Association kaba la long mynta ka sngi ha Indoor Stadium, Mawlai Datbaki, ban ia shong pyrkhat halor ka jingpan jubab ka sorkar na ki trai Taksi balei ba kim kamai kali ha ka 27 tarik u jymmang, 2015 ka sngi ba khot Pakhang shnong ka HNLC. Hadien ba la wai katei ka jingialang ki trai Taksi, haba u nong thohkhubor u wad jingtip ki lad khubor ki la iathuh ba ki la shim ia ka rai ba kin leit da kawei ka sur sha ka sorkar bad kin leit ban ai da kajuh ka jubab, balei ba kim mih surok ha katei ka 27 tarik u jymmang.
Shuh shuh ka lad khubor ka la ong ba haduh mynta ym pat tip ka jubab kaba kumno ki trai taksi kin leit ban ai sha ka ophis u Regional Transport Authority, tangba la thikna ba ka jubab ba kin ai ka dei beit kajuh ka jubab ha kawei ka sur. Lah ban kdew ba khyndiat snem mynshuwa ki don palat 5000 tylli ki Taxi kiba kamai ha East Khasi Hills bad ka jingtip ba la ioh lum ka la iathuh ba mynta ki la kot sha ka 6000 tam ne duna. Tang mar ia ioh shithi na ka sorkar kaba la pan jubab na ki trai kali, la iathuh ba ki trai kali ki la leit ban ai la ki jong ki jong ki jubab jong ki , hynrei la ong ba kiba bun ki leit ban jubab ba ki la sei kali ha surok hynrei ym don passenger ha katei ka sngi. La ong ruh ba kiba bun ki leit ban phah ia ka jubab jong ki sha u Commissioner ka Transport ha ka ophis kaba don ha Sawlad, hynrei la ong ba ha ka 10 tarik u jylliew ki trai kali kin leit ban phah ia ka jubab jong ki lyngba ka seng EKHLTWA sha ka ophis u DTO Cum Secretary Regional Transport Authority.
Katba na ka liang ka Shillong Region Taxi’s Owner’s and Driver Association lyngba ka kyrwoh na u President bah R. Jana bad u General Secretary bah James S Malngiang ka la kyntu ia baroh ki trai Taxi kiba don hapoh katei ka seng bad kumjuh ruh kiba don shabar jong ka ba ki dei ban leit ai la ki jong ki jong ki jubab jong ki da ka jingthoh sha ka ophis u Commissioner of Transport ka sorkar jylla kaba don ha Sawlad bad ban ai kopi sha u District Transport Officer cum Secretary Regional Transport Authority bad ban buh kopi ruh halade. Ka kyrwoh na kitei ki nongialam katei ka seng ki la ong ba mynta ka sngi ka 8 tarik u jylliew ki la wan ia kynduh ia u DTO ban ia phylliew jingmut halor katei ka jingshah pan jubab ba kim mih surok ha ka 27 tarik u jymmang.