10 tarik yn iathir ka CEC ka UDP ban neh ne weng na PDF

Shillong, 30 Lber:
Ka jingialang jong ka Central Executive Committee (CEC) ka United Democratic Party (UDP) kan long ha ka 10 tarik Iaiong ban wan, ban iakren bad ban shim ia ka rai, la yn dang kyrshan ne em ia ka Executive Committee ka People Democratic Forum (PDF) ba ialam da Bah Pynshngain N Syiem ha KHADC.
Ka jingialang ha katei ka sngi kan iakren ruh na ka bynta ban pynkhreh ia ka elekshon MLA kaban long lashem snem ha ka jylla.
U General Secretary ka UDP u Dr Jemino Mawthoh u la ong ba ka jingialang ka sub-committee hynnin ka la phah ia ka jingsngew jongka, sha ka CEC ba kan shim ia ka rai kaba sngew biang halor ka jyrsieh ka KHADC.
“Ia ka jinglap ka House Committee ka KHADC ia ki kam jyrsieh ka EC ba ialam da u Bah Pynshngain N Syiem,yn iakren bad yn shim ia ka rai kaba kut ha ka 10 tarik Iaiong”, la ong u Dr Mawthoh.
Ka UDP ka la thaw ia ka Sub Committee on KHADC Affairs ban peit bniah bad bishar ia ka kaiphod jong ka House Committee kaba tohkit halor ki kam bamsap ha KHADC na ka pisa kaba la iohlum na ka Professional Tax na nongpoh bad Nongstoin khamtam ka jingpaw ka kyrteng u CEM ban Pynshngaiñ N Syiem bad u bah Antonio War EM pla tyngka ha katei ka kaiphod.
U Bah BM Lanong hynnin ka sngi u la ong ba ka Sub Committee kan phah ia ka rai sha ka Party ban weng noh ne em na ka PDF kaba ialam da u bah Pynshngaiñ N Syiem hadien ba peit bniah ia ka kaiphod ka House Committee.
Ha katei ka kaiphod jong ka HC, la iasoi da u nongialam ka Liang pyrshah uba dei u Chairman u bah Manstudy Nongrem, ka nongialam jong ki MDC ka HSPDP ka kong Teilinia Thangkhiew, nongialam ki MDC ka KHNAM bah Adelbert Nongrum bad nongialam ki MDC ka UDP u bah Teinwell Dkhar kiba dei ki dkhot ha ka kynuhn synrop ka PDF.