10 sngi yn tohkit ki pulit, ia kiba shah kem na Smit

Shillong, 27 Nailar:
Ki pulit kin ioh ban tohkit sa 10 sngi ia ki briew kiba shah kem halor ka jingkynnoh donkti ban pyniap briew halor ka jingkynnoh menshohnoh ha shnong Smit.
U SP ka East Khasi Hills u Bah Mariahom Kharkhrang u la ong ba kine ki briew la dep tohkit hynniew sngi hynrei na ka liang ka Kashari ka la ailad biang ia ki pulit ban pynlong ia ka jingtohkit hapoh 10 sngi ia kitei baroh kiba shah kynnoh donkti ha ka jingjia ha Smit.
U la ong ba la rejister ia ka mukotduma ruh halor ka jingkawang maw ia ki kali, ia ki kali pulit ba la wanrah ia ka jingjot jong ki kali ha katei ka shnong ha ka jingjia kaba la jia ha ka 14 tarik Nailar.
Lah ban kdew ba ki pulit ki la kem 12 ngut ki briew kynthup 6 ngut ki kynthei bad 6 ngut ki shynrang halor ka jingkynnoh ba ki donkti ha ka jingjia ha Smit ha kaba la wanrah ia ka jingkhlad noh ki lain gut na ka longing namar ka jingtied u paidbhur halor ka jingkynnoh kum ki menshohnoh.