Shillong, 23 Jymmang:
Ka jinglait tuh ka result matrik ne Secondary School Leaving Certificate (SSLC) ka la pynkyndit ia ki bor pyniaid ka Meghalaya Board of School Education (MBOSE) haduh ba kin thung ia ka jingtohkit ban wad mano bad kumno ka lait tuh kane ka result.
Ia ka jingtohkit yn khlieh da u Bah Walter Roy Lyngdoh u Secretary ka tnad pule puthi ban pyndep ia ka jingtohkit hapoh shiphew sngi halor Kane ka jingjia.
Kane kam dei shuh ka jingjia ba phylla ha ka MBoSE namar ba ha ki snem ba la dep run, ka la don ka jinglait tuh ki jingkylli ha ki klas X, klas IX bad ka klas XI. U Executive chairman ka MBOSE u Pravin Bakshi haba kren sha ki nongthoh khubor mynta ka sngi ula ba ka jingjia ka la pundit bad sngewkhia jur kaba ktah mationg ia ka MBoSE.
“Ngi la thung da ka jingtohkit ban leh da u secretary ka tnad pule puthi u bah Walter Roy Lyngdoh bad un pyndep ban tohkit hapoh shiphew sngi ha kana un pynngat ia kiba donkti, ban ai jingmut kumno ban pynbha ia ka jingtreikam”, la ong u Bakshi. U la iathuh ba ma u ruh u ioh jingtip ia kane ka jinglait tuh mynmiet kumba 10:30 eiei ha ki social media kata shi sngi shwa ba ka MBoSE kan pynlait kaba la buh mynta ka sngi.
U la iathuh ba ka jinglait tuh ka dei na ka website bym don jingiadei eiei bad ka MBoSE. Ki website ba la ithuh ne pyniasoh bad ka MBoSE ki don hynniew tylli kynthup ka www.megresults.nic.in, www.Internet.in, www.knowyourresult.com, www.India results.com, www.examresults.net/meghalaya, www.jagranjosh.com, bad www.results.amarujala.com.
Kane ka result lait tuh ka dei tang jong ka klas X bad kata ruh tang ki top 20 hynrei ia ka klas XII kam don kano kano ka jinglait tuh.
U Bakshi u la ong ba ka dei tang ka jinglait tuh hynrei kam don kano kano ka jingleh tuh ia ki mark jong ki kandidet. Na ka liang u Bakshi u la kyntait ban kubur ba kan don kano kano ka jingdonkti ki briew na MBoSE hynrei u la ong ba ka jingtohkit kan leh ia kaba donkam. Katkum ka jingiathuh u Bakshi ka MBoSE ka la dep ban pynbiang ia ka result naduh ka 18 tarik mynta u bnai bad ka ju pynlait ia ka result sha ki website 15 minit shwa ban pyllait paidbah.
Phi don ban ong eiei?