Shillong: Hadien ba la duh mynsiem na ka jingiakynduh bad u myntri ka tnad pule dangle dang shen, ki nonghikai skul deficit ha ka jylla ba kynthup ka Khasi Jaiñtia Deficit School Teachers’ Association (KJDSTA) bad ka Garo Hills Deficit School Teachers’ and Employees Association (GHDSTEA) ki la ioh mynsiem biang mynta ka sngi hadien ba ki la ioh ia ka jingkular na u Myntri Rangbah u Conrad K Sangma ban pynbeit ia ki jingeh mardor.
U President ka KJDSTA u Bah ED Nongsiang haba kren hadien ba la iakynduh ia u Myntri Rangbah myn hynnin ka sngi, u la iathuh ba u Myntri Rangbah u la kular ban khot ia ka jingialang ka kynhun myntri hapoh shiphew sngi ban iapynbeit ia ka jingsiew tulop thymmai ia ki nonghikai deficit katkum ka 5th Pay Commission.
Dang shen, ki nonghikai ki la iakynduh ia u myntri ka tnad pule, u Bah Lahkmen Rymbui hynrei ka jingiakren kam shym la long kaba seisoh.
U Conrad Sangma myntri rangbah ka Jylla, haba ia kynduh ia ki nonghikai Deficit ha ka Sngi Thohdieng:Wlytan
“Ka jingiakren bad u Myntri Rangbah ka long kaba ioh mynsiem bad kaba plak beit ha ka mat”, la ong u Bah Nongsiang bad bynrap, “u Myntri Rangbah u la pynthikna ban iakren ia ka tulop hapoh shiphew sngi”.
Ki don 6,686 ngut ki nonghikai skul deficit ha ka jylla naduh ki primary haduh ki higher secondary kiban ioh jingmyntoi na ka jingsiew tulop thymmai shisien ba la pyntreikam ka sorkar. Ka jingsiew tulop thymmai ka la treikam naduh ka 1 tarik Kyllalyngkot 2017 ia baroh ki nongtrei sorkar jylla.
U Bah Nongsiang u la iathuh ba ki nonghikai ki la rah ruh ia ka mat hakhmat u Myntri Rangbah ban ai baibam tymmen ia ki nonghikai skul deficit katkum ka jingai jingmut ka Fifth Pay Commission bad ban pyntreikam ia ka Assured Carrier Progressive Scheme (ACPS) bad ka bai sumar.
Ha kaba iadei bad ka jinglymmuh ki kot pule ba la pynmih da ka Meghalaya Board of School Education (MBoSE), u Bah Nongsiang u la iathuh ba u Myntri Rangbah u la kular ban lum ia ka jingialang ban bishar ia kane bad ban thung noh da u chairman ba pura jong ka Board khnang ban pynkhlain ia ka jingtreikam.
Katkum ka jingong u Bah Nongsiang, u Myntri Rangbah u la kular ba ka sorkar kan sa pyllait paidbah ia ka Draft Education Policy hapoh ar bnai, khnang ba ki paidbah bad kumjuh ki nonghikai kin ioh ban ai jingmut sha ka sorkar halor kane.
Kiwei pat ki mat ba ki nonghikai ki la pynsngew ha u Myntri Rangbah ka long ka jingshimti noh ka sorkar ia ka kam hikai ne provincialisation, ka service rules ia ki nonghikai deficit.
“U Myntri Rangbah u la kular ban khot iakren biang bad ki nonghikai deficit ban iakren halor ka provincialization”, la ong u Bah Nongsiang.