10 sngi ai por, ban weng ia ka khyrdop khajna beain ha Risiang

Nongstoiñ, 1 Rymphang:
“Lada ka ain MMPO (Meghalaya Maintainance of Public Order) ka trei kam ia kiba thang ophis sorkar, balei ym lah ban pynngat ia ki runar kiba don kti ban thang ia ka jingkieng dieng ha shnong Risiang ha katei ka ain MMPO” ong u Samla Ricky Sohlang President ka HANC (Hynniewtrep Achik National Council) sengkmie ha ka jingialang paidbah jong ka Joint Action Committee on Social Organisation Maweit Area (JACOSOMA).
Shuh shuh u bah Sohlang u la pynpaw ruh ia ka jingsngewkhia halor ka jingbym lah ki bor jong ka ain ban kem ia ki runar kiba don kti ban thang ia katei ka jingkieng dieng ha Risiang. Ia katei ka jingialang paidbah la pynlong da ka JACOSOMA ha Iew Maweit ha ka sngi balang jong ka taiew ha kaba ha katei ka jingialang la wan ban iasnoh kti lang da baroh ki kynhun sengbhalang na katei ka thain, ki riew rangbahong ka thain, ki seng longkmie ki paidbah bad kiwei kiwei.
Ha katei ka jingialang na ka liang jong ka JACOSOMA, ka la dawa ruh ia ki bor jong ka ain ba kidei ban pynlong ka jingthwet kaba jur ia ki runar kiba don kti ban thang ia katei ka jingkieng namar ba katei ka jingkieng kadei ka mar jong ka sorkar bad khamtam ba kadei ruh ka jingkieng kaba ai jingshakri ia ki spah tylli ki shnong kiba don ha ka thain Maweit.
Ym tang kata ha kaba iadei pat bad ka jingdon jong ka khyrdop khrong khajna beain, na ka liang jong ka JACOSOMA da kawei ka jingmut ka la shim ruh ia ka rai ban ai por shi taiew ia katei ka khyrdop lum pisa ba dei ban weng noh na ka surok PWD kaba don ha ka shnong Risiang hapoh 10 sngi.