10 km ka surok, 3 snem ym pat dep siang rong

Shillong, 7 Jylliew:
Ka KSU Myntriang Unit ka la phah da ka jingthoh sha u Executive Engineer ka PWD ( road) Jowai ban pyntip ia ka jingsniew bad ka jingbym biang ka surok Mynksa –Khlokynring . Katkum ka kyrwoh na ka KSU la ong ba katei ka surok Mynksa-Khlokynring ka dei kaba jrong tang 10 kilomitar eiei bad la sdang ban siang rong ia ka naduh u snem 2012 hynrei haduh kine ki sngi ym pat lah ban pyn dep ban siang rong ia katei ka 10 kilomitar eiei watla la kot sha ka 3 snem.
Ka kyrwoh na u Ma C Lamurong, Vice President KSU Myntriang Unit, ka la iathuh ba ka jingsniew jubor katei ka surok ka la pyndik ia ka leit ka wan ki paidbah, khamtam ha ka pang ka shitom. La iathuh ba ha katei ka jingiaid lynti ban siang rong kaba 3 snem mynta ia katei ka surok, ka long ba katba ki nongsiang rong ki dang iaid jai shi jai shakhmat, shadien pat kaba la dep siang ka long thik kumba ka bym pat siang rong.