10 hajar tyngka ai khusnam ka FKJGP ia u Samla ba pass bha

Jowai, 18 Jymmang:
Ka seng Federation of Khasi-Jaintia and Garo People (FKJGP) ka la hiar sha shnong Kyn dongtuber ban ia kynduh ia u samla Berister Swer, u samla pule ka Government Boys Higher Secondary School, Jowai u ba la ioh bat ia ka nam ba ar ha ka kyrdan top ten ha eksam HSSLC Science katkum ka result ba dang shu dep pynbna.
Ki nongialam ka FKJGP na Jaintia Hills kiba kynthup ia u President jong ka, u ma Tuesday Lytep, u ma Damian S War bad kiwei kiwei ki la kyrkhu kyrdoh bad kitbok kitrwiang ruh ia utei u samla ba un dang iai kiew ha ka kyrdang kaba shalor shuh shuh.
Ka FKJGP kum ka dak ka jingkmen ba utei u samla u la wanrah burom ia ka District hi baroh kawei, ka la noh synniah 10 hajar tyngka na ka bynta ki jingdonkam jong u ha ki jingpule.