10.52 klur mang ka sorkar pdeng ïa ka iingmane ka Nongsawlia

Shillong:U Lamphang ka ïingdorbar thawaiñ ka jylla, u bah Metbah Lyngdoh myn hynnin sngi, u la leit sha ka shnong Nongsawlia kaba don ha Sohra kum ka dak ban leit leh burom ïa ka sngi kyrpang jong u Reverend Thomas Jones kaba don ha Sohra.

 Kum ban shu pyntip, u Reverend Thomas u la wan ïuhkjat ha Sohra ha u snem 1841.

Ha kane ka jingleit leh donburom bad ban kynmaw ïa ki synñiang kaba u la leh khamtam eh ban pynïoh ïa ki dak Khasi bad ban shakri ruh ïa ka imlang sahlang ha kiba bun ki liang, u bah Metbah u la leit ban buh syntiew ha u mot dur jong u Thomas Jones kaba don ha phyllaw jong ka ophis treikam jong ka Thomas Jones School of Mission.

 Ha kane ka sngi la ïa don ryngkat ruh u CEM ka KHADC, bah Titos Chyne, MLA ka Shella bah Balajied Synrem, u Pastor F.R Kharkrang, u Commissioner and Secretary ka Meghalaya Assembly, Dr. Andrew Simons bad kiwei de ki riew rangbah.

 Haba ai jingkren ha katei ka sngi u bah Metbah u la ong, ka jingwan jong u Thomas Jones kam dei tang ban ïalap, hynrei ban ai ruh ka jingshakri naka bynta ka jong ngi ka jaitbynriew Khasi.

Ka long kaei kaei ban kynmaw kyrpang ïa u ha kum kane ka sngi namar ba ngi la ïoh ïa ki dak kaba long kum ka jingpynithuh ïa ki dak kaba long kum ka jingpynithuh ïaka jylla sha ka pyrthei.

 Na ka liang u bah Metbah u la ong, ban pynkhlaiñ ïa kane, ka long mynta ïa ngi ki nongmihkhmat ban buddien ïa ka Resolution kaba la wanrah hapoh ka ïingdorbar thawaiñ ha u snem 2018 na ka bynta ban pynbor ïaka sorkar India ban pynrung noh ïaka ktien Khasi ha ka khyrnit kaba phra (eight schedule) jong ka riti synshar (constitution of India).

 Ha kajuh ka sngi, u Lamphang ka ïingdorbar thawaiñ uba long ruh u myntri barim ka sorkar jylla ba khmih ïaka tnat jngohkai pyrthei, u la pynbna halor ka skhim Pilgrimage Rejuvenation and Spiritual, Heritage Augmentation Drive (PRASAD) na ka bynta ban pynbha ïa ki jaka leh ñiam bad ki jaka kiba dei ki jingtei kiba rim kiba don hapoh ka Ri India.

Ha kane ka jingpynbna ha ka jingïalang kaba lyngkot, na ka liang u bah Metbah u la pyntip ba ka sorkar India ka ladep ban mang haduh 10.52 klur tyngka na ka bynta ka ïingmane jong ka balang Presbyterian kaba don ha Nongsawlia.

 Ha katei kajuh ka sngi, u bah Metbah u la leit ruh ban jurip ïa ka surok ban leit sha Shella konstitwensi ha ryngkat ka jingdonlang u MLA ka Shella, bah Balajied.