1 taiew aipor ka RBYF, ban pynbiang ia ka Umsohlait PS, byrngem khang tala

Nongpoh:U Bah Raynold Dkhar, General Secretary ka RBYF Mawhati Circle, u la phah ka kyrwoh sha ki lad pathaikhubor, na ka bynta ban pynpaw ia ka jingsngewkhia kaba jur, halor ka jingbym pat treikam pura ka Umsohlait Police Station, kata wah hadien 5 snem la plie paidbah ia katei ka Police Station.

Ha ka kyrwoh, la pynpaw ba ka seng ka lap ba katei ka Police Station ka dang don hapdeng shibun bah ki jingduna bad kaba la pynjynjar eh ia ki paidbah kiba donkam ha katei ka Police Station, nalorkata la pynpaw ruh ba wat ki nongtrei hapoh katei ka Police Station, ki kynduh jingeh, namar ka jingduna kiba don hapoh katei ka Police Staion.

Haba iadei bad ki jingduna hapoh katei ka Police Station, utei u nongialam ka RBYF, u la kynnoh ba ka dei namar ka jingbymshimkhia ka sorkar ban pynbit pynbiang ia ki jingduna hapoh katei ka Police Station, kumta halor katei ka jingduna hapoh katei ka Police Station, ka la pynlong ba kam lah ban ai ka jingshakri kaba janai ia ki paidbah na kiba bun tylli ki shnong kiba hap hapoh ka Mawhati Constituency.

Utei u nongialam ka RBYF, u la pynpaw ruh ba ha u snem ba la dep, ka seng ka la leit ban khangtala ia katei noh shipor ia katei ka Police Station, hynrei tang katto katne por ba la ailad ban plie biang, da ka jingangnud ba ka sorkar kan lah ban pynbiang ia ki jingduna kiba don ha katei ka Police Station, pynban ka jingbym shimkhia ka sorkar ban pynbiang ia katei ka Police Station, ka la pynbitar eh ia ka seng.

Shuh shuh, la pynpaw ruh ba halor katei ka Police Station, ka seng ka la pyntip sha u Mynti ki kam pohiing ka sorkar jylla bad kumjuh ruh sha u MLA ka Mawhati Constituency, hynrei kata haduh mynta ym shym la iohi dak ei ei ruh em.

Ka seng ka aipor shi Taiew ban pynbeit noh halor ki jingduna kiba don ha katei ka Police Station bad kane kan dei ka sien kaba khadduh ba ka seng kan ud sha ki bor bahalor, hynrei lada ka sorkar kam patiaw, ka seng kam banse ban shim da kiwei pat ki lad ki lynti kiba kham tyngeh ne da kaba khangtala noh syndon ia katei ka Police Station kaba don ha Umsohlait.