Shillong 27’lyngkot:
U nongbud ba ha syndah jong u bah Renikton Lyngdoh Tongkhar mynba u dang don ha ka seng UDP kata u bah Commander Shang pliang uba dei ruh u nongpynmih phlim Khasi ha kane ka jylla u la ong ba watla u bah Renikton u la kynriah noh na ka seng UDP sha ka HSPDP hynrei na ka liang jong u un ym kynran dien satia hynrei un iai don bad katei ka seng bad un nang pynkhlain shuh shuh ia ka rukom treikam katei ka seng ha Mawkyrwat Konstitwensi. U bah Commander u la ong ba um kwah ban ryngkang dieng kper na kawei ka party sha kawei pat bad u la ong ba ka rai kaba u la shim naduh nyngkong ka dei ka rai rangbah bad un iai neh bad ka seng UDP.
U la kyntait halor ka jingkynthoh jong ki katto katne ngut ba ka seng UDP ka la nang stait ha Mawkyrwat hynrei u la ong ba kate ka seng ka don ia ki paidbah nongkyrshan jong ka kiba la kyrhan ha ki elekshon kiba la de khamta kiba la pynjo ia u kyrtong ka UDP ha ka elekshon MDC kaba dang shu dep hynrei uba la kynriah noh sha ka seng Congress. Ki nongkitkam bad ki nongkyrshan ki dang don da ki hajar ngut bad nga kyrmen ba katei ka seng kan jop don burom ha ka elekshon MLA ka ban sa wan kata ha u 2018, ong u bah Commander Shangpliang.
Utei u nongialam ka UDP na Mawkyrwat u la ong ruh ba kumba mynta u la long uba la khreh ban ia aireng ha ka   elekshon MLA 2018 lada ka Party UDP ka ibit ia u, hynrei baroh ka rai kaba stad ka shong ha ka Party, ong u bah Command.  Ki nongkyrshan ka UDP ha Mawkyrwat kim dei ban duh mynsiem watla u bah Renikton u la la phet noh na ka seng hynrei ki dei ban duriap kumno ban pynkhlain ia ka party, u la ong biang.
Utei u samla rangbah u la ong ba u don shibun ki mat treikam kiba un trei na ka bynta ka Mawkyrwat Konstitwensi kiba un leit ruh ban tynruh ia ki bor sorkar watla um pat long eiei ruh. U la iathuh ba u kwah ruh ban trei na ka bynta ki nongrep namar kiba bun ki paidbah ha ka thain bad ha ka jylla hi  baroh kawei ki dei ki nongrep bad u la iathuh ba na ka liang jongu u la dep ban dawa na ka sorkar ban pyntreikam noh ia ka ain halor ka rep ka riang khnang ban ban ai jingmyntoi ia ki paidbah bad u la iathuh ba yn sa pynlong da ki jingialang paidbah ban pynsngewthuh halor kane ka ain ban iada bad ai jingmyntoi ia ki nongrep. Bad u la pynpaw ruh ka jingsngewkhia halor ka jingbym donkam donkam jong ki samla ba la nang la stad.
Shuwa ba un jam sha ka politik u bah Commander Shangpliang u dei u nongthohkhubor, u dei u Joint Editor jong u Rupang bad Nongsaiñ Hima, u de ruh u Direktor bad u Producer ha ki phlim Khasi kaba kawei na ki phlim ba iaid iew bha jong u mynta ka dei ka phlim Sa Shisien,   u bat kum u president jong ka seng ki nongpynmih phlim ha ka jylla (Meghalaya Film Makers Association), u dei ruh uwei na ki nongialam jong ka South West Khasi Youth Federation (SWKYF) Mawkyrwat kaba dei ka seng ban dawa District South West kaba la urlong mynta bad mynta u dei ruh u nongialam Chairman jong ka Joint Action Committee of All Meghalaya Farmer Union (JACAMFU) ka seng synrop jong ki nongrep ha ka jylla kaba dawa ban rukom kyntiew ia ka rep ka riang.