Shillong, 14 Naitung:
U President rangbah ka KSU u samla Lambokstar Marngar, u la ong ba ka KSU ka la ioh ia ka shithi mynta ka sngi ba ka sorkar ka khot ia kren ha ka 19 tarik mynta u bnai; hynrei haduh mynta ka KSU kam pat shim ia kano kano ka rai la kan leit ne em sha katei ka miej jingiakren bad ka sorkar.
U samla Marngar u la ong ba ka mat ba ka sorkar ka la khot ban ia kren ka dei halor ka aiƱ pyrkhing mynder kaba ka la ai kyrteng kum ka Comprehensive Mechanism bad kam don eiei ka mat kaba ia dei bad ka jingiakhih lynti Rel.
“Haduh mynta ngim pat shim rai eiei la ngin leit ne-em sha katei ka jingiakren, ngim pat treh eie ban ong mynta la ngin leit ia kren ne-em” ong utei u President ka KSU haba ia kren bad u Rupang lyngba ka phone.
Haba ia kren pat bad u President ka FKJGP u bah Welbirth Rani lyngba ka phone u la ong ba ki la ioh jingtip ia katei ka jingkhot ia kren ka sorkar bad ki la rai ban leit ia kren bad ka mat ba la khot ka dei halor ka Comprehensive Mechanism.
U General Secretary ka HNYF u bah Sadon Blah ruh haba ia kren lyngba ka telephone u la ong ba la ioh jingtip bad la rai ban leit ia kren. Lah ban kdew ba katei ka jingkhot ia kren u myntri rangbah ka dei ia baroh ki 13 sengbhalang kiba la donlang ha kajuh ka kynhun ha ka por ia khih ILP. La sngewthuh ba ha katei ka jingiakren kan don ruh ka bynta ban ia kren na ka bynta ka lynti rel.
Mynta ka jingialang lynti rel ka KSU ha Sohra
Lashai ka sngi ka 15tarik u naitung ka KSU Sohra Circle kan pynlong ia ka jingialang ha iew Sohra ka ban sdang naduh ka por 12 baje shiteng sngi. Haba ia kren bad u Rupang u President ka KSU Sohra Circle u bah Shem Synrem, u la ong ba la pyntip lut ia baroh ki dkhot ka KSU ha ka thaiƱ Sohra bad la pynlong khnang ia ka jingialang lashai ka sngi namarba ka dei ka sngi iew bad baroh ki shnogn na kyndong ka thain ka Sohra ki wan iew bad kin iohsngew lut ia ka jingpynshai ki nongialam ka KSU ki ban wan na ka Sengkmie kiba kynthup ia u samla Donald V Thabah General Secretary.