Shillong, 22 Risaw:
Ka iew dohkha kaba ar ha ka nongbah ba la pynlong da ka sorkar ka la shongshit bha mynta ka sngi. Ia kane ka iew kaba la pynlong ha phyllaw u Soso Tham Auditorium la plie paidbah da u myntri sorkar u Bah AL Hek.
Ha kane ka iew, la don kumba 30 tylli tam ki dukan die dohkha bad ki mar rep kiba la die da ki nongrep ba wan na kylleng ki jaka jong ka jylla.
Nalor ki dohkha, la die ruh ia ki mar rep kiba don jingiadei bad kane ka kam dohkha. Ha kane ka iew ba la pynlong da ka tnad ri dohkha ka jylla la sakhi lang da ki tnad sorkar bapher bapher kynthup ia ka tnad Animal Husbandry & Veterinary, Agriculture, Horticulture, Soil & Water Conservation, Meghalaya Khadi & Village Industries Board, Registrar of Cooperative Societies bad ka RRTC Umran.
Ki heh sorkar ba sakhi lang ha kane ka iew ki kynthup ia u myntri sorkar Bah AL Hek kum u kongsan, u Chief secretary Bah PBO Warjri, principal secretary u KN Kumar, u CEO ka Meghalaya Basin Development Authority (MBDA) u RM Mishra, u deputy commissioner ka East Khasi hills u Sanjay Goyal, Additional deputy commissioner u Bah CVD Diengdoh bad kiwei.
U Bah Hek u la ong ba kane ka dei ka lad ia ki samla ka jylla ba kin mihshakhmat ban shim kabu ban shim ia ka kam ri dohkha kum ka lad kamai bad ban nym shaniah tang ha ki kam sorkar. U la ong ba ka State Aqua Mission ka dei ka jingkyrkhu ia ki paidbah ka jylla bad kaba donkam ka long ban ai shuh shuh ia ka jingpynshai paidbah ia ka jingdonkam jong kane ka kam khnang ba ki paidbah kin nang ban leh bad ban ioh jingmyntoi.
Katba u Chief secretary u Bah PBO Warjri u la ong ba ka long kaba donkam ban pynpaw paidbah ia kane ka kam kaban kyntiew ia ka ioh ka kot jong ka jylla jong ki nongrep khamtam sha ki jaka nongkyndong.
Shwa ia kane u principal secretary u KN Kumar u la ong ba ka Aqua Mission ka dei kawei na ki khyndai tylli ki jingthmu ba ka sorkar lyngba ka Meghalaya Basin Development and Livelihood Promotion Programme na ka bynta ban kyntiew ia ka ioh ka kot jong ki paidbah ka jylla.
U Kumar u la ong ba ka iew dohkha kaba la long mynshem ka long kaba jop ha kaba ka jingdawa dohkha ka jur bha ha kaba la lah ban die haduh 5 Metric ton ki dohkha ba la pynmih na kane ka jylla.
Naduh ba la pyntreikam ia kane ka skhim ha ka 5 tarik Lber, 2012, u Kumar u la iathu ba haduh mynta 5681 tylli ki pung dohkha la lah ban pynmih dohkha bad sa kumba 20,000 tylli ki pung dang don ha ka lynti ba kin sa lah ban pynmih dohkha ha u snem ban wan kata u 2015.
U la ong ruh ba don 12 tylli ki jaka pynkha pynroi ia ki dohkha bad 7 tylli na ki la lah ban sei ia ki dohkha kum ki symbai. U la ong ba ka jingthmu jong ka sorkar ka long ban pynlah ia ka jylla ba kan lah ban pynmih dohkha na ka bynta ki jingdonkam khlem da donkam shuh ban thied nabar bad ruh ban die shabar ia kaba tam.
U Bah Hek u la sam ruh ia ka khusnam pisa sha ki nongri dohkha ba jop ha ka jingiakop ba T. 10,000/ ba kynthup ia u Bah S Kurkalang na Mylliem Block, East Khasi Hills District, ka Kong R Laru na Umsning Block, Ri Bhoi District, Bah W Marbaniang na Mairang Block, West Khasi Hills District, Kong BK Nongtnger na Ranikor Block, South West Khasi Hills District, ka Sengborlang Women Self Help Group na West Jaintia Hills District, Bah R Pohtam na East Jaintia Hills District, u N Ch Marak na Betasing Block, South West Garo Hills, u S R Marak na Gambegre Block, West Garo Hills, u P Sangma na North Garo Hills bad u R R Marak na East Garo Hills.
La pynlong ruh ia ka jingiakop dro ia ki khynnah ha kane ka sngi.