Shillong, 19 Lber:

Ka tnad sam bor-ding jong ka jylla ka MeECL ka la sahram haduh T.6 lak duna ia ki 50 tylli ki longing ha ka shnong Kut, ka shnong kaba don marjan bad ka Puriang kaba hap hapoh Mawryngkneng konsti-twensi bad katei ka jing-khein ka dei tang hapoh u nohprah, 2016. Katkum ka jingkheiñ ba u Rupang u la ioh na ka MeECL ki la don haduh 222 tylli ki longing kiba tan bording ha katei ka shnong hynrei ha ka 18 tarik u rymphang, 2016 la ot noh 51 tylli ki longing bad mynta kiba pyndonkam bording ha katei ka shnong ki don sa 171 ïng. Na kitei ki 51 kiba la shah ot ki don tang 2 tylli ki longing kiba la phah ot hi da ka mon lajong kata ka Shok Sohtun kaba ym shah ram eiei shipiah ruh bad ka Kesimai Marboh kaba dang sah sa T.1198 tyngka ban siew, kiwei pat ki dei kiba la shah ot, namar ka jingbym siew shuh ia ka bai-thang ding la bun bnai.

Na ki 51 ki don 19 tylli ki longing kiba pyndonkam da ka BPLM, kawei ka BPLU hynrei baroh ki dei ki DLT. Haba kheiñ lang baroh ia ka bai ding ba ka MeECL ka sahram ha ka shnong Kut ka poi sha ka T.5,80,317 tyngka (lait noh ki jingkheiñ ia ki naia). Na katei ka jingkheiñ la iohi ba ka bai-thangding kaba rit eh kaba la shah ot noh ka dei T.5987.17 tyngka jong ka Risting Lawai katba kaba hehduh dei jong ka kong Bakorlang Lawai kaba haduh T.T.47,930.15 tyngka, Udia Sohtun kaba haduh T.43,275.03 tyngka bad Stella Lawai T.29,755.62 tyngka. Kiba bun na kitei ki bill ki dei kiba T.10 hajar shajrong bad T.20 hajar shapoh bad don ruh katto katne kiba hapoh ka T.10 hajar tyngka.

Lah ban kdew ba khyndiat sngi mynshuwa ka la don ka jingkhih bitar ki paidbah ha ka por ba ka seng saiñpyrthei ka Aam Aadmi Party ( AAP) ka la leit ban ia kynduh ia kiba bun ki paidbah jong katei ka shnong, namar ka jingshah ot bording bad ka la don ruh ka jingkynnoh ba ka dei ka jingthur mur jong ka tnad MeECL ha kaba la ong ba kam ju pynpoi bai-thangding sha ki paidbah, ym ju don ba wan peit mitar hynrei la pynpoi kynsan ia ka bill hadien 10 snem ba la pyndonkam bad katei ka bill kaba da ki phew hajar tyngka , ka la don ruh ka jingkynnoh ba wat hadien ba la dep ban shah ot ruh ka MeECL ka dang pynpoi bai thangding sha ki paidbah.

U Public Relation Officer ( PRO) katei ka tnad u bah P.Sahkhar haba ia kren bad une u nongthoh khubor u la ong ba baroh ki jingkynnoh pyrshah ia ka MeECL ha kaba ia dei bad ka jingjia ha ka shnong Kut ka dei ka bym lah ban pdiang. U la ong ba naduh ba la ai ding ia ki paidbah la ju pynpoi bai-thang ding manla u bnai bad ki don ruh ia ki rikod ba ki leit peit ia u mitar bad ki briew katei ka tnad ki ju leit ruh ban lum pisa bai thangding shaduh sha Shnong. Halor ka jingkynnoh ba wat hadien ba la shah ot ka bill ka dang poi u bah P.Sahkhar u la ong ba ka long kaba dei ba ka MeECL ka pynpoi ia ki bill sha kitei ki longing kiba la shah ot hynrei ha katei ka bill ym shym la khein shuh ia ki bnai ba ki la shah ot bad la pynpoi sha ki ia ki bill kiba rim ha ka por ba ki dang pyndonkam hynrei ha katei ka bill la kheiñlang ia ka Arrears bad ka sut , kumta katba nangmih uwei u bnai ka nangkiew shi nangkiew.

U bah Sahkhar u la ong ba katkum ka jingkynthoh ha ki kotkhubor ba ka kong Bakorlang Lawai, ka ioh bill hadien 10 snem ba la ioh ding u la ong ba la ai ding ia ka kong Bakor naduh 1 tarik u nohprah, 2007 bad naduh ba ka la iohding la pynpoi bill manla u bnai hynre ihadhu mynta tang shibnai ruh kam siew, ong u bah Sahkhar da kaba pyni ruh ia ki rikod ba la leit ban peit ia u mitar bad ki bill kiba poi man u bnai. U la iathuh ba napdeng ki 51 tylli ki longing don kiba la siew teng ruh bad don ki bym ju siew ruh bad ka jingkynnoh bym ju pynpoi bill ka dei kaba bakla. Shuh shuh halor ka jingkren u sordar katei ka shnong sha ki kotkhubor u bah Sahkhar u la ong ba ki nongtrei katei ka tnad ki ju leit na ka por sha ka por ban peit mitar bad kumjuh ban lum bai-thangding na ki nongshong pyndonkam bording ha ka shnong Kut hynrei ym ju don ba ujor mano mano ruh ia ka jingeh ba ki ia kynduh kaba pyni ba ka iaid beit iaid ryntih, lada dei ba ki ujor ngi la ioh jingtip ha ophis, u la ong.

Une u nongthohkhubor u la kylli na u PRO ka MeECL hato lada jia ba kitei ki ing kiba la shah ot bording ki kwah ban tan bording biang sha ing jong ki katei ka tnad kan dang ai ne-em , “Ngim ai tad haduh ba ki siew ia ki bill kiba rim katkum ka jinglah jong ki la ki kwah ban siew lut shisien siew ne ki kwah ban siew khyndiat khyndiat ruh ngi ailad” ong u bah Sahkhar uba la batai bniah ba lada ki kular ban siew khyndiat khyndiat ruh yn ai ding ia ki wat haba kaba rim kam pat khuid lut ruh. La kylli biang hato kumno katei ka tnad kan leh ia kitei ki pisa kiba la duhei kaba la kot sha ka T.6 lak eiei, u bah Sahkhar u la ong ba ym lah leh eiei shuh lada kitei ki longing kim kwah ding shuh ka mut ka la duhei hynrei lada ki dang kwah bording ka pisa kan wan biang.