Jowai, 19 Lber:

KJP Synod Mihngi lyngba u Moderator jong ka, u Rev. RH Lyngkhoi ka la pynpaw ia ka jing-sngewkhia kaba jur halor ka jingshah lehbein ki longkmie, ki khynnah kynthei kaba la nang jur ha kine ki sngi.

“Ka KJP Synod Mihngi ka dap da ka jingsngewkhia kaba jur halor ka jingjyllei ka jingshah lehbein ki kynthei naduh ki kam batbor bad kam pyniap bad na ka liang ka KJP Synod ka la pynbeit ban duwai kyrpang halor kane”, la pynbna u Moderator ka KJPSM ha ka jingiaseng bah mynne ka por step ha shwa ban khot ia u Pastor Rangbah, u Rev. Dr. JF Jyrwa ban duwai kyrpang halor kane ka jingshah ban bein jong ki.

Ka KJP Synod Mihngi mynta ka sngi ka la pynwai noh ia ka jingiaseng bah ba 15 jong ka kaba la long naduh 16 tarik une u bnai ha ka Balang Ummulong kaba hap ha Wahiajer-Moodymmai Presbytery.

Ha kane ka jingiaseng bah, u Rev BB Lamin bad u Rev. Dr. JM Hynniewta ki la long ki nongsam ia ka khubor u Blei ha ka jingiaseng kaba 10:30 mynstep bad 1:30 nohphai sngi. Ha ka jingiaseng nohphai sngi, u Pastor Hynniewta u la pynshong nongrim ia ka jingkren jong u na ka Shithi ba-ar u Appostol Paul u Thimothy 3 ka lynnong dkhot 1 haduh 5 kaba ong, ‘hynrei to tip ia kane ba haki sngi kiba khadduh kin wan kipor bashisha. namar ki briew kinlong kiba ieit tang ia lade, kiba ieit sbai, kiba kren sarong, kiba leh khraw, kiba kren sinew, kibym kohnguh iala ki kmie ki kpa ki bym sngewnguh. Kibym khuid, kiba khlem ieit iala ka kynja, kiba khlem map, kiba krensiar, kibym suitñiew, kiba runar,kibym ieit iaka ba bha, ki nongdie lok, kiba hangamei,kiba leh meng kiba ieit iaka jingsngewbha khamtam ban ia kaba ki ieit ia U Blei’.

U Pastor Hynniewta u la ong ba ka jingim Khristan ka long ka jingim kaba ngi hap ban iaksaid man ka sngi ban ioh ia ka dur jong u Blei ha ngi kumba u la thaw ia u briew ha ka dur jong u. U Pastor u la ong ba bunbah ki Khristan ki long riewblei tang ha kaba paw shabar katba harieh pat ki leh ia ka kam ba tngit kaba isih ha khmat U Blei. “Wat long ki khristan kiba arsap hynrei to long kiba riewblei naduh ka mynsiem khnang ba ka dur jong u Blei kan paw ha ngi”, la ong u Pastor.

U Pastor Hynniewta u la buh jingkylli ia ki phew phew hajar ki paid riewngeit lada ki lap ia ki nongsharai balang lane ia ki dkhot Balang kiba beh jingiaseng man ka sngi U Blei bad kiba ai jingkynshew ruh kaba heh ha iing Mane bad lehse ngi tip pat ia ka jinglong ba tngit (Bamsap) jong u, kum ki nongsharai balang bad kum ki Khristan ngi dei ban iarap ia u ban un ioh ia ka jingim kaba riewblei ha ryngkat ka jingsngewthuh janai ia ka bor jong ka jingriewblei.

U la ong ruh haba ngi pyndap ia kino kino ki Form bad haba kylli ia ngi ia ka Niam ngi thoh Khristan kam pher lada ngi don ha ka Balang Catholic, Presbyterian, Balang U Blei lane kino kino ki Balang Christan ba ki don. “Lada kum ki Khristan ngi long kiba riewblei bad ngi sngewthuh ia ka bor jong ka jingriewblei, khlem artatien baroh ki jingsniew ha kane ka pyrthei kin duh kin dam noh ha ka shi minit”, la ong u Pastor.

Ha kane ka sngi, la pynsngewlung mynsiem shuh shuh ia ki paid riewngeit da ki jingrwai shem mynsiem na ki kynhun rwai choir bapher bapher naduh ka jingiaseng mynstep bad nohphai sngi.

Ha ka jingiaseng por 10:30 mynstep la ioh ia ka jingrwai Choir na ka Balang Laban Presbyterian church, Umsyiem, Sutnga bad Balang Umlyngka katba ha ka nohphai sngi pat la ioh ia ka jingrwai na ka Balang Ummulong kum ka nongpdiang ia katei ka jingiaseng Synod bad na ka Balang Jowai, Laitumkhrah Presbyterian church na ka Standing Choir KJP Synod Mihngi.

Ha kane ka jingiaseng Synod, la pynkyntang Pro Pastor ia ki 9 ngut ki dkhot na ka Balang bapher bapher kiba la pyndep ia ki jingpule jong ki bad ruh 6 ngut la pynkyntang Pastor ia ki Pro Pastor. Ia kitei ki 9 ngut yn sa pynkyntang ia ki kum ki Pastor ha ka jingiaseng kaban sa long la shym snem ha ka Balang Tynring, Laitumkhrah Presbytery.

Ka jingiaseng Assembly kan long ha ka 6 haduh 9 tarik une u bnai ban wan ha Sohryngkham.