![](https://www.urupang.com/wp-content/uploads/2024/07/image-64.png)
Ka Supreme Court jong ka Bangladesh, mynta ka sngi, ka la pynhiar ia ka bhah kam na bynta ki longing jong ki shipai ba ialeh laitluid sha ka 7 percent, hynrei katei ka kashari, kam shym la rai satia ban pynduh noh ia katei ka bhah kyrpang. Ha ka 1tarik naitung 2024, ka High Court, ka la rai ban ai bhah 30 percent sha kiba ha iing jong ki shipai kiba ialeh laitluid jong ka Bangladesh.
![](https://www.urupang.com/wp-content/uploads/2024/07/image-65.png)
U Attorney General, AM Amin Uddin , u iathuh ha ka AFP, ba ka Supreme Court, ka shim, ba ka rai jong ka High Court, ka dei kaba beain bad kumta, la pynbna, ba 93 percent, ka jingthung kam kan dei beit ha ka jinglah jong ki samla wad kam, katba 7 percent kan dei na bynta ki longing jong kito ki shipai kiba ialeh laitluid ia ka Bangladesh, ha ka thma 1971.
Kat haduh mynta kiba iap, ki la poi sha ka 133ngut ha katei ka Ri bad ka jingpynjari korphiw, ka dang iai bteng ha baroh kawei ka ri bad la aibor ruh ia ki shipai, ba kin siat beit ia kino kino ki briew, kiba pynkhein ia kitei ki kyndon jong ka korphiw.
Ka rai jong ka Supreme Court mynta ka sngi, ka long ba ka 5 percent, kan dei na bynta ki kam civil service ia kiba ha iing jong ki shipai kiba ialeh laitluid bad sa 2 percent, kan dei ia kiwei pat ki jait kam.
Mynta ka sngi, ki don 27ngut ki samla pule kiba na India, kiba wan phai, lyngba ka kad khaii ha Dawki bad kitei ki kynthup ia 6ngut ki nong Meghalaya bad nangta ki don sa 11ngut ki samla pule na Nepal.
Hynnin ka sngi, ki don 115ngut kiba wan phai kiba dei ki nong India, ba kynthup ia 8ngut ki nong Meghalaya bad nangta sa 168 ngut ki nong Nepal bad iwei na Canada bad kitei ki dei kiba wan phai ly ngba ka Dawki.
Hynnin ka sngi, ki don 30ngut ki samla pule ka jylla, kiba wan phai lyngba ka Tripura.
Phi don ban ong eiei?