Shillong, 30 Naitung:
U Bah Adelbert Nongrum MDC ka Jaiaw Constituency, haba pyn mih khubor mynta ka sngi, ula pyrshah jur, ia ka jingthmu pynjlan ia ka samoi treikam jongki MDC, kumba la pyn sngew da u myntri ka tnat District Council Affairs. “Ban pynjlan ia ka samoi treikam jong ki MDC tang namar ka jingkwah ban phiah konstituensi ka long ba bym shongnia bad shong nongrim” ong U Bah Adelbert.
“Na ka bynta ban pynbeit,pynthmmai ne ban pynduh ia kano kano ka konstituensi, ha ka jingshisha ym dei ban leh 5 (san) bnai shuwa ka ilekshon hynrei la kumno kumno 2(ar) ne 3 (lai) snem shuwa, khnang ba kan ym wanrah ia ka jingthut ne ka jingsngew sih ne ka jingklumar jing mut na ka bynta jongno jongno ruh” ong U bah Nongrum, ha kaba ula kyn noh ruh “Lehse, u myntri baroh shikatta u iohthiah”.
Kane ka jingthmu dei ban pynrem da baroh, namar ba ka don ka jingmut kaba rieh ha ka. “Tang na ka bynta ban phiah konstituensi,phi kloi ban lum ia ki CEM jong ki lai tylli ki ADC, hato phi kloi mo ban lum ia ki lai tylli ki ADC na ka bynta ban pynbha,pynkhlain bad ban nang ai bor shuh shuh ia ki, kumba la seng nongrim katkum ka 6th Scheduled ka riti synshar paidbah ka Ri” kynthoh biang U MDC ka Jaiaw, uba dei na ka seng KHNAM. La pynsngew shuh U bah Adelbert, ha kaba u ieng ruh halor ka nongrim, kaba ula kren ha dorbar KHADC, ha kaba iadei bad ka jingpyrkhing ia kiwei pat ki bym dei ki trai ri trai muluk ban ioh ban iashim bynta ha ka ban jied ia ki dkhot sha kine ki ADC, katkum ka jinglong ka thain,ktien,kolshor bad kiwei kiwei de tangba kane kam dei pat ban wanrah ia ka jingsngewthuh bakla ne ba kin don kiba shim kabu iohnong sain hima ha ka Ri Hynniewtrep, pynkut ka kyrwoh na utei u rangbah.