Mawkyrwat, 19 Lber:

U Symbud Myntri Rangbah barim ka jylla u Bah Rowell Lyngdoh u ba long ruh u MLA ka Mawkyrwat myn ha ka sngi thohdieng jong ka taiew u la ioh ban plie paidbah ia ka jaka sumar ei, kaba la pyniaid da ka District Medical & Health Officer, SWKH kaba la long ha Mawten Government Primary School.

Ha katei ka sngi la iadonlang ruh u Bah H.M Shangpliang,Secretary Health & Family Welfare Cum Mission NHM Meghalaya, ka Deputy Commissioner ka SWKH kong Ripnar Lyngdoh, ka DM&HO ka Mwkyrwat ka Dr. (MRS) M. Marbaniang bad kiwei kiwei.

Haba ai jingkren ha katei ka sngi, na ka liang u bah Rowell Lyngdoh u la ong ba kane ka dei ka prokram ba nyngkong tam ha ka District naduh ba la ioh ia ka District ba pura bad ka jingthmu jong kane ka prokram ka long ban ai jingtip sha ki paidbah halor ka jingkongsan jong ka koit ka khiah. U la kyntu ruh ia ki paidbah ba kin shim ia ki lad ki kabu kiba ka sorkar ka la ai sha kin a ka bynta ban nang khang kyntiew ia ka koit ka khiah. U la ban jur ruh halor ka jingling ba kongsan jong ka jinglehkhuid da kaba kyntu ia iwei pa iwei ban pynlong ia ka shnong ka thaw kaba khuid ba suba. U la kyntu ruh ia ki samla ba kin kiar na kaba shongkha khynnah namar kane ka ktah ia ka koit ka khiah bad ka jinglong jingsan ha ka met. Namarkata u la kyntu ia ki paidbah nongshong shnong ka thaain Mawkyrwat ba kin ai ka jingiatreilang bad ka sorkar na ka bynta ban nang kyntiew ia ka District na kawei ka por sha kawei pat.

Ha katei ka sngi la ioh ruh ia ka jingkren na u symbud kongsan bah H.M Shangpliang u ba la kyntu ia ki paidbah ban pyndonkam hok ia ki scheme bapher bapher ba ka sorkar ka la ai na ka bynta ka jingmyntoi u paidbah. Ia ka jingialang ha katei ka sngi la ioh ban pyniaid da I kong Ripnar Lyngdoh, DC ka SWKH ha ka jingiadonlang ruh ki khynnah skul, ki nongtrei sorkar bad ki paidbah kiba la wan sha sakhi ia katei ka prokram.