Shillong, 29 K’lyngkot:   U Chief Secretary ka jylla u Bah PBO Warjri u la kyntu ia ki nongtrei sorkar ba kin trei tista bad kitkhia ia ka kam. U Bah Warjri u la ong ha jing ialang jong ka Meghalaya State Government Employees’ Federation (MSGEF) kaba la long mynta ka sngi Thohdieng ha U Soso Tham Auditorium.
Haba kren kum u  kongsan, u Bah Warjri u la kubur ba ki don ki jingduna ha ka liang ka pisa ka pilain ha ka jylla hynrei na ka liang ka sorkar ka pyrshang beit ban pynbiang ia ki jingdonkam jong ki nongtrei sorkar.
“Nga pynshlur ia ki nongtrei sorkar ban trei shitom namar ba ka sorkar ka dei ia ngi”, la ong u Bah Warjri.
U la ong ba ki kam sorkar kim dei ban sah thylli wat tang shi sngi ruh bad dei ban pyndap wut wut haba don ki kam ba lait.
“Ka sorkar kan pyrshang ban pynbha ia ka ain ki nongtrei sorkar bad ki nongtrei sorkar ki dei ban pynthikna ba ka ACR jongki kan long kaba biang bad ban phah ha ka por ba biang”, u la ong.
U President ba shah jied thymmai ka Federation u Bah Macmillan Lyngdoh u la ong ba ka seng ka kyntu ia ka sorkar ba kan pyrkhat ban pynthymmai noh ia ka jingsiew ia ki nongtrei sorkar jylla ban sdang naduh ka 1 tarik Kyllalyngkot mynta u snem.
U la ong ba ka sub –committee ka seng kan sa shong jingialang ban pule bniah ia ka kaiphod ka 7th Pay Revision bad kan sa phah sha ka sorkar.
U Bah Lyngdoh u la kyntu ia ka sorkar haba ka pyrkhing ia ki nongtrei ban bat kam shnong kam thaw katkum ka Meghalaya Conduct (Service) rules, ka dei ban ailad lem ia ki ban bat ia ki kam Balang bad ki sengbhalang.
“Ki don ki dkhot kiba pynpaw ia ka jingsngew lyngngoh namar ka jingthmu ka sorkar ban pynkylla ia ka ain ia ki nongtrei sorkar bad lada kan treikam bun kin nym lah shuh ban iashim bynta ha ki seng bhalang bad ki kam shnong”, la ong u Bah Lyngdoh.
Na ka liang ki nongtrei sorkar, ki la pynpaw ia ka jingsngew pyrshah ia ka jingthung kam ia ki nongtrei ba la shong thait namar ba ka pynduh lad ia ka jingkiew kam jong kiwei.